വാഴാനി ഡാമിലെ നാല് ഷട്ടറുകൾ തുറന്നുവിട്ടു; ഈ ഭാഗങ്ങളിലെ പുഴകളിലെ ജലനിരപ്പ് ഉയരാൻ സാധ്യത; ജാഗ്രത മുന്നറിയിപ്പ് നൽകി അധികൃതർ

തൃശൂർ: വാഴാനി ഡാമിലെ നാല് ഷട്ടറുകൾ തുറന്നു. അധികജലം പുറത്തേക്ക് ഒഴുക്കുന്നതിൻ്റെ ഭാഗമായി 5 സെൻ്റീമീറ്റർ വീതമാണ് ഷട്ടറുകൾ ഉയർത്തിയത്. ഡാമിൻ്റെ ജലനിരപ്പ് ക്രമീകരിക്കുന്നതിനും സമീപത്തുണ്ടാകാൻ സാധ്യതയുള്ള അപകടങ്ങൾ മുൻകൂട്ടി കണ്ടുമുള്ള നടപടിയാണിത്.

തിങ്കളാഴ്ച രാവിലെ 11 മണിയോടെയാണ് അസിസ്റ്റൻ്റ് എൻജിനീയർ പി.എസ്. സാൽവിൻ്റെ നേതൃത്വത്തിലുള്ള സംഘം ഷട്ടറുകൾ തുറന്നത്. നിലവിൽ ഡാമിൻ്റെ ജലനിരപ്പ് 60.32 ശതമാനമാണ്. ഇത് സംഭരണശേഷിയുടെ 89.79 ശതമാനത്തോളം വരും. ന്യൂനമർദ്ദ സാധ്യത ഉൾപ്പെടെയുള്ള സാഹചര്യങ്ങൾ മുൻനിർത്തി മുൻകരുതൽ എന്ന നിലയിലാണ് സ്പിൽവേ ഷട്ടറുകളിലൂടെ അധികജലം ഒഴുക്കുന്നത്.

പ്രാദേശിക സാഹചര്യങ്ങൾ വിലയിരുത്തിയും തദ്ദേശസ്വയംഭരണ സ്ഥാപന മേധാവികളുമായി ചർച്ച ചെയ്തും ജനങ്ങളുടെ സുരക്ഷ ഉറപ്പുവരുത്തിക്കൊണ്ട് പകൽ സമയങ്ങളിൽ സ്പിൽവേ ഷട്ടറുകൾ ഘട്ടം ഘട്ടമായി ഒരു ദിവസം പരമാവധി 10 സെ.മി എന്ന രീതിയിൽ, മൊത്തം 30 സെ.മി വരെ തുറന്ന് അധികജലം പുറത്തേക്ക് ഒഴുക്കാൻ ജില്ലാ കളക്ടർ ഉത്തരവിട്ടിരുന്നു. ഇതിൻ്റെ അടിസ്ഥാനത്തിലാണ് ഇപ്പോൾ നടപടി സ്വീകരിച്ചിരിക്കുന്നത്.