എല്ലാം മറന്ന് വളരെ സന്തോഷപൂർവം കുടുംബത്തോടൊപ്പം വിനോദയാത്രയ്ക്ക് തിരിച്ച മലയാളി ഡോക്ടർ; ഒടുവിൽ തായ്‌ലൻഡ് സന്ദർശനത്തിനിടെ മുങ്ങി മരണം; വേദനയായി രാഹുലന്റെ വിയോഗം
ചാലക്കുടി: കുടുംബത്തോടൊപ്പമുള്ള വിനോദയാത്രയ്ക്കിടെ തായ്‌ലൻഡിൽ മലയാളി ഡോക്ടർ മുങ്ങി മരിച്ചു. തിരുച്ചിറപ്പള്ളി റെയിൽവേ ഡിവിഷനൽ ആശുപത്രിയിലെ മെഡിക്കൽ ഓഫിസർ ഡോ. രാഹുലൻ (37) ആണ് മരിച്ചത്. ചാലക്കുടി പോട്ട തച്ചുടപ്പറമ്പ് സ്വദേശിയാണ് ഇദ്ദേഹം.
ഭാര്യ ഡോ. ബേബി മിനുവിനൊപ്പം ഈ മാസം 12-നാണ് ഡോ. രാഹുലൻ തായ്‌ലൻഡിൽ എത്തിയത്. വിവിധ വിനോദസഞ്ചാര കേന്ദ്രങ്ങൾ സന്ദർശിക്കുന്നതിനിടയിൽ കടലിലെ ആഴമില്ലാത്ത ഭാഗത്ത് നീന്തുന്നതിനിടയിലാണ് അപകടം സംഭവിച്ചത്. മുങ്ങിത്താഴ്ന്ന ഡോ. രാഹുലനെ സമീപത്തെ ആശുപത്രിയിലും പിന്നീട് സ്പെഷ്യാലിറ്റി ആശുപത്രിയിലും എത്തിച്ചെങ്കിലും രാത്രി എട്ടുമണിയോടെ മരണം സ്ഥിരീകരിക്കുകയായിരുന്നു.
ഉച്ചയ്ക്ക് മുമ്പ് ഡോ. രാഹുലൻ സ്കൂബ ഡൈവിങ് നടത്തിയിരുന്നു. അപ്പോൾ യാതൊരുവിധ ശാരീരിക ബുദ്ധിമുട്ടുകളും ഉണ്ടായിരുന്നില്ലെന്ന് ബന്ധുക്കൾ അറിയിച്ചു. ഓസ്ട്രേലിയയിൽ എൻജിനീയറായ സഹോദരൻ ശരത്ത് തായ്‌ലൻഡിലെത്തിയിട്ടുണ്ട്. മൃതദേഹം ഇന്ന് വൈകിട്ട് നാട്ടിലെത്തിക്കും. ശനിയാഴ്ച ഉച്ചയ്ക്ക് ഒന്നിന് ചാലക്കുടി മുനിസിപ്പൽ ശ്മശാനത്തിൽ സംസ്കാരം നടത്തുമെന്നും അറിയിച്ചിട്ടുണ്ട്.
