പാലക്കാട്: പാലക്കാട് നെല്ലിയാമ്പതിയിൽ വിനോദ സഞ്ചാരികളുമായി പോയ ജീപ്പ് നിയന്ത്രണം വിട്ട് അപകടം. വ്യൂ പോയന്‍റ് കാണാൻ പോകവെയാണ് നിയന്ത്രണം നഷ്ടമായത്. തുടർന്ന് ജീപ്പ് താഴ്ചയിലേക്ക് മറിഞ്ഞു. അപകടത്തിൽ എട്ട് പേർക്ക് പരിക്കേറ്റു. എന്നാൽ പരിക്കുകൾ സാരമുള്ളതല്ലെന്നാണ് സൂചന. പരിക്കേറ്റവരെ നെന്മാറയിലെ സ്വകാര്യ ആശുപത്രിയിൽ പ്രവേശിപ്പിച്ചു. ശക്തമായ മഴയെ തുടര്‍ന്ന് റോഡിൽ നല്ല രീതിയിൽ തെന്നലുണ്ടായിരുന്നുവെന്നാണ് വിവരം. ഇതാണ് വാഹനത്തിന്റെ നിയന്ത്രണം നഷ്ടപ്പെടാൻ കാരണം.

നെല്ലിയാമ്പതിയിലെ പ്രധാന കേന്ദ്രത്തിൽ നിന്ന് പുറപ്പെടുന്ന വാഹനങ്ങൾ വിനോദ സഞ്ചാര വകുപ്പ് തന്നെ ഏര്‍പ്പെടുത്തുന്നത്. ഈ ജീപ്പുകളിലാണ് സഞ്ചാരികൾ വ്യൂ പോയന്‍റിലേക്ക് പോകുന്നത്. ഓഫ് റോഡുകളില്‍ വാഹനം ഓടിക്കാൻ പരിചയമുള്ളവരാണ് ജീപ്പ് ഓടിക്കുന്നത്.

കുത്തനെയുള്ള ഇറക്കവും, കല്ലും ചെളിയും മറ്റും നിറഞ്ഞതാണ് റോഡ്. റോഡിൽ തെന്നലുണ്ടായിരുന്നതിനാൽ നിയന്ത്രണം പോയി പെട്ടെന്ന് ജീപ്പ് മറിഞ്ഞ് താഴ്ചയിലേക്ക് വീഴുകയായിരുന്നുവെന്നാണ് വിവരം. അപകടത്തിൽപ്പെട്ടവരുടെ കൂടുതൽ വിവരങ്ങള്‍ ലഭ്യമായിട്ടില്ല.

നെല്ലിയാമ്പതിഅപകടംതാഴ്ചയിലേക്ക് മറിഞ്ഞു

സ്വന്തം ലേഖകൻ