കുറ്റിച്ചൽ: പെട്രോൾ പമ്പിൽ നിന്ന് ഇന്ധനം നിറച്ചവർക്ക് എല്ലാം എട്ടിന്റെ പണി. തിരുവനന്തപുരം കാട്ടാക്കടയിൽ കുറ്റിച്ചലിൽ പ്രവർത്തിക്കുന്ന ഇന്ത്യൻ ഓയിൽ പെട്രോൾ പമ്പിലാണ് സംഭവം നടന്നത്. അടിച്ചവർക്കെല്ലാം കിട്ടിയത് വെള്ളം കലർന്ന പെട്രോൾ.

വാഹനങ്ങൾ തകരാറിലായതോടെ വാഹന ഉടമകൾ വ്യാപക പ്രതിഷേധവുമായി പെട്രോൾ പമ്പിൽ തടിച്ചുകൂടി. ഒടുവിൽ തകരാർ പരിഹരിക്കാമെന്ന് ഉടമ സമ്മതിച്ചതോടെയാണ് പ്രതിഷേധം അവസാനിച്ചത്.

ചൊവാഴ്ച മുതൽ കുറ്റിച്ചൽ പമ്പിൽ നിന്നും പെട്രോൾ നിറച്ചവർ പലയിടത്തും വഴിയിലായതോടെ വർക്ക്‌ഷോപ്പിൽ നിന്നും മെക്കാനിക്ക് നടത്തിയ പരിശോധനയിലാണ് പെട്രോളിൽ വെള്ളം കലർന്നത് കണ്ടെത്തിയത്. ആദ്യം സംഭവം നിഷേധിച്ച പമ്പ് ജീവനക്കാർ പിന്നീട് തങ്ങളുടെ പ്രശ്നമാണെന്ന് സ്ഥിരീകരിച്ചു.

നഷ്ടപരിഹാരം ലഭിക്കാതെ പിന്മാറില്ലെന്ന നിലപാടെടുത്തതോടെ വാഹനങ്ങളെല്ലാം പെട്രോൾപമ്പ് ഉടമ തന്നെ തകരാറ് പരിഹരിക്കാമെന്ന് ഉറപ്പ് നൽകി പമ്പ് പൂട്ടുകയും ചെയ്തു. പ്രദേശത്ത് കഴിഞ്ഞ ദിവസം മുതൽ തുടർച്ചയായി പെയ്യുന്ന മഴയിൽ പെട്രോൾ ടാങ്കിലേക്ക് വെള്ളം കയറിയതാകാം പ്രശ്നത്തിന് കാരണമെന്നാണ് പ്രാഥമിക നിഗമനമെന്ന് അധികൃതർ പറഞ്ഞു.

പെട്രോൾ പമ്പ്ഇന്ധനത്തിൽ വെള്ളംപ്രതിഷേധം

സ്വന്തം ലേഖകൻ