ബൈക്കിൽ കയറ്റാത്തതിൽ വൈരാഗ്യം; സുഹൃത്തിനെ തടഞ്ഞുനിർത്തി കൊടുവാളിന് വെട്ടിപ്പരിക്കേൽപ്പിച്ചു; ഒരാൾ അറസ്റ്റിൽ

തൃശൂർ: ബൈക്കിൽ കയറ്റാത്തതിന്റെ വൈരാഗ്യത്തിൽ സുഹൃത്തിനെ കൊടുവാൾ കൊണ്ട് വെട്ടി ഗുരുതരമായി പരിക്കേൽപ്പിച്ച സംഭവത്തിൽ ഒരാൾ അറസ്റ്റിൽ. വരന്തരപ്പിള്ളി വേലപ്പാടം കിണർ ദേശത്ത് പുൽകിരിപറമ്പിൽ വീട്ടിൽ ഷിനോജ് (45) നെയാണ് വരന്തരപ്പിള്ളി പൊലീസ് അറസ്റ്റ് ചെയ്തത്. വേലപ്പാടം സ്വദേശി മൻസൂറിനെ (34) ആണ് പ്രതി ആക്രമിച്ചത്.

സെപ്റ്റംബർ 12-ന് രാത്രിയാണ് സംഭവം. ഭക്ഷണം കഴിക്കാൻ ക്ഷണിക്കാനായി ഷിനോജിന്റെ വീട്ടിലേക്ക് പോയ മൻസൂറിനെ വീടിനു മുന്നിൽ തടഞ്ഞുനിർത്തി. അടുക്കളയിൽ നിന്ന് എടുത്ത കൊടുവാൾ ഉപയോഗിച്ച് വെട്ടി വെട്ടിപ്പരിക്കേൽപ്പിക്കുകയായിരുന്നു.

പ്രതിയായ ഷിനോജ് വരന്തരപ്പിള്ളി സ്റ്റേഷനിൽ 2020-ൽ വ്യാജമദ്യക്കേസ് അടക്കം രണ്ട് ക്രിമിനൽ കേസുകളിൽ പ്രതിയാണ്. വരന്തരപ്പിള്ളി സ്റ്റേഷൻ ഇൻസ്പെക്ടർ മനോജ് കെ.എൻ., സബ്ബ് ഇൻസ്പെക്ടർമാരായ പോൾസൺ, സുനിൽകുമാർ, അലി, സീനിയർ സിവിൽ പൊലീസ് ഓഫീസർമാരായ മുരുകദാസ്, സജീവൻ, രാഗേഷ് എന്നിവരടങ്ങിയ അന്വേഷണ സംഘമാണ് പ്രതിയെ അറസ്റ്റ് ചെയ്തത്.