ലഹരിക്ക് പണം നൽകിയില്ല; അമ്മൂമ്മയെ ഡംബൽ കൊണ്ട് തലയ്ക്കടിച്ചു കൊന്നു; സാക്ഷികളിലാതിരുന്ന കേസിൽ നിർണായകമായത് ശാസ്ത്രീയ തെളിവുകൾ; ചെറുമകന് ഒമ്പത് വർഷം തടവും പിഴയും

ആലപ്പുഴ: ലഹരിമരുന്ന് വാങ്ങാൻ പണം നൽകാത്തതിൽ സ്വന്തം അമ്മൂമ്മയെ ഡംബൽ ഉപയോഗിച്ച് തലയ്ക്കടിച്ചു കൊലപ്പെടുത്തിയ കേസിൽ ചെറുമകന് ഒമ്പത് വർഷം കഠിനതടവ്. അരൂർ പഞ്ചായത്ത് ആറാം വാർഡിൽ അക്ഷയ് നിവാസിൽ അനന്തുവിനെയാണ് (26) ആലപ്പുഴ അഡീഷണൽ സെഷൻസ് കോടതി ശിക്ഷിച്ചത്. തടവ് ശിക്ഷയ്ക്ക് പുറമെ ഒരു ലക്ഷം രൂപ പിഴയും കോടതി വിധിച്ചിട്ടുണ്ട്.

കൊലപാതകം നടത്തിയത് ഡംബൽ ഉപയോഗിച്ച്

2019 ജൂൺ 9-നായിരുന്നു നാടിനെ നടുക്കിയ ക്രൂരകൃത്യം നടന്നത്. പട്ടണക്കാട് പുതിയകാവ് ഹരിജൻ കോളനിയിൽ ഒറ്റയ്ക്ക് താമസിച്ചിരുന്ന 72 വയസ്സുകാരി ശാന്തയാണ് കൊല്ലപ്പെട്ടത്. ലഹരിമരുന്നിന് അടിമയായ അനന്തു പണം ആവശ്യപ്പെട്ടെങ്കിലും ശാന്ത നൽകാൻ തയ്യാറായില്ല. ഇതിലുള്ള വൈരാഗ്യം മൂലം രാത്രി വീട്ടിലെത്തിയ പ്രതി വ്യായാമത്തിന് ഉപയോഗിക്കുന്ന ഡംബൽ കൊണ്ട് ശാന്തയുടെ തലയ്ക്കടിച്ചു കൊലപ്പെടുത്തുകയായിരുന്നു.

തെളിവില്ലാതിരുന്ന കേസിൽ കുടുക്കിയത് ശാസ്ത്രീയ പരിശോധന

കൃത്യം നടത്തിയ ശേഷം പ്രതി നേരിട്ട് പൊലീസ് സ്റ്റേഷനിൽ എത്തി കീഴടങ്ങുകയായിരുന്നു. കൊലപാതകത്തിന് നേരിട്ടുള്ള സാക്ഷികൾ ഇല്ലാതിരുന്ന കേസിൽ ശാസ്ത്രീയ തെളിവുകളാണ് നിർണ്ണായകമായത്. പട്ടണക്കാട് പൊലീസ് നടത്തിയ കൃത്യമായ അന്വേഷണത്തിനൊടുവിൽ കോടതിയിൽ കുറ്റപത്രം സമർപ്പിച്ചു.

പബ്ലിക് പ്രോസിക്യൂട്ടർ അംബിക കൃഷ്ണൻ, അഡ്വ. അഖിലാ കൃഷ്ണൻ എന്നിവർ പ്രോസിക്യൂഷന് വേണ്ടി ഹാജരായി. നിലവിൽ പൂജപ്പുര സെൻട്രൽ ജയിലിൽ കഴിയുന്ന പ്രതിയെ ആലപ്പുഴ ജില്ലാ കോടതിയിൽ ഹാജരാക്കിയാണ് ശിക്ഷാവിധി പ്രസ്താവിച്ചത്.