സംസ്ഥാനത്ത് കാലവര്‍ഷം പ്രതീക്ഷിച്ചതിനേക്കാള്‍ മുന്നേ; അതിതീവ്രമായ മഴയില്‍ മൂന്ന് പേര്‍ മരിച്ചു; അടുത്ത ഏഴ് ദിവസം അതീവ ജാഗ്രതാ നിര്‍ദ്ദേശം; കെഎസ്ഇബിക്ക് മാത്രം 27 കോടി രൂപയുടെ നഷ്ടം
തിരുവനന്തപുരം: സംസ്ഥാനത്ത് കാലവര്‍ഷം പ്രതീക്ഷിച്ചതിനേക്കാള്‍ മുന്നേ എത്തി. അതിതീവ്രമായ മഴയില്‍ മൂന്ന് പേരുടെ ജീവന്‍ നഷ്ടപ്പെട്ടു. ശക്തമായ മഴ അടുത്ത മൂന്ന് ദിവസം കൂടി തുടരുമെന്നാണ് കേന്ദ്ര കാലാവസ്ഥ വകുപ്പ് അറിയിച്ചിരിക്കുന്നത്. സംസ്ഥാനത്ത് അടുത്ത ഏഴ് ദിവസം അതീവ ജാഗ്രത പാലിക്കേണ്ടതായി മുഖ്യമന്ത്രിയുടെ നിര്‍ദേശമുണ്ട്. വിവിധ ജില്ലകളിലായി നിരവധി അപകടങ്ങളും നാശനഷ്ടങ്ങളും റിപ്പോര്‍ട്ട് ചെയ്തിട്ടുണ്ട്.
മലപ്പുറത്ത് കാഞ്ഞിരപ്പുഴയില്‍ മണല്‍ വാരുന്നതിനിടെ വഞ്ചി മറിഞ്ഞ് ഒരാള്‍ മരിച്ചു. പാലക്കപ്പറമ്പ് മേത്തല പടന്ന സ്വദേശിയായ സന്തോഷാണ് മരിച്ചത്. കോഴിക്കോട് അഴിയൂരില്‍ നിര്‍മാണത്തിലിരുന്ന കിണര്‍ ഇടിഞ്ഞുവീണ് കരിയാട് സ്വദേശി രതീഷ് മരിച്ചു. കണ്ണൂരില്‍ ദേശീയപാത നിര്‍മാണത്തിനിടെ മണ്ണിടിഞ്ഞ് വീണ് ജാര്‍ഖണ്ഡില്‍നിന്നുള്ള തൊഴിലാളി ബിയാസ് മരിച്ചു. വേറെയും ഒരാളെ കാണാതായതായി റിപ്പോര്‍ട്ടുണ്ട്. ശക്തമായ കാറ്റിലും മഴയിലും വൈദ്യുതി ലൈന്‍ വീണതും മരങ്ങള്‍ കടപുഴകി വീണതുമാണ് പല ഭാഗങ്ങളിലും വൈദ്യുതിയും ഗതാഗതവും തടസ്സപ്പെട്ടത്.
മലപ്പുറത്ത് കാര്‍ തോട്ടിലേക്കു മറിഞ്ഞ് നാല് പേര്‍ക്ക് പരിക്കേറ്റു. പാലക്കാട് പത്തിരിപ്പാലയില്‍ ബസിന് മുകളില്‍ മരം വീണെങ്കിലും യാത്രക്കാര്‍ സുരക്ഷിതരാണ്. കോഴിക്കോട് മാവൂരില്‍ പാര്‍ക്കിങ്ങിലായിരുന്ന കാറിന് മുകളില്‍ മതില്‍ ഇടിഞ്ഞുവീണെങ്കിലും അപകടം ഒഴിവായി. കൊച്ചിയിലും ആലപ്പുഴയിലും കടലാക്രമണം രൂക്ഷമാകുകയാണ്. കെഎസ്ഇബിക്ക് മാത്രം 27 കോടി രൂപയുടെ നഷ്ടം ഇതിനകം റിപ്പോര്‍ട്ട് ചെയ്തിട്ടുണ്ട്. അതേസമയം, ഇടുക്കി, കൊല്ലം, പാലക്കാട് തുടങ്ങി നിരവധി ജില്ലകളില്‍ റോഡുകളും പാലങ്ങളും തകര്‍ന്നതായി അറിയപ്പെടുന്നു.
മഴയും കാറ്റും പരിഗണിച്ച് സര്‍ക്കാര്‍ അഗാധ ജാഗ്രതയോടെയാണ് മുന്നോട്ട് പോവുന്നത്. രക്ഷാപ്രവര്‍ത്തനങ്ങള്‍ ശക്തമാക്കുന്നതിന് ബന്ധപ്പെട്ട വകുപ്പുകള്‍ക്ക് നിര്‍ദ്ദേശം നല്‍കിയതായും അധികൃതര്‍ വ്യക്തമാക്കി.
