സീറ്റ് കുറച്ച് സൗകര്യങ്ങള്‍ കൂട്ടി കണ്ണൂര്‍ ജനശതാബ്ദി; ഞായറാഴ്ച മുതല്‍ എല്‍.എച്ച്.ബി. റേക്ക്

കോഴിക്കോട്: കണ്ണൂര്‍ ജനശതാബ്ദി എക്‌സ്പ്രസിന് എല്‍.എച്ച്.ബി. കോച്ചുകള്‍ അനുവദിച്ച്് റെയില്‍വേ. ദീര്‍ഘനാളത്തെ കാത്തിരിപ്പിനൊടുവില്‍ 29 മുതലാണ് എല്‍.എച്ച്.ബി. കോച്ചുകള്‍ എത്തുന്നത്. പുതിയ കോച്ചുകളെത്തുന്നതോടെ യാത്രാസൗകര്യം മെച്ചപ്പെടുമെങ്കിലും സീറ്റുകളുടെ എണ്ണം കുറയും. നിലവില്‍ ജനശതാബ്ദി 21 ഐ.സി.എഫ്. കോച്ചുകളുമായാണ് സര്‍വീസ് നടത്തുന്നത്. ഇവ എല്‍.എച്ച്.ബി. കോച്ചുകളായി മാറും. 16 ചെയര്‍കാറുകളും മൂന്ന് എ.സി. ചെയര്‍കാറുകളും അടങ്ങിയ നിലവിലെ കോച്ചുകള്‍ അതേപടിയാണ് എല്‍.എച്ച്.ബി.യിലക്ക് മാറുന്നത്. എന്നാല്‍, നിലവിലുള്ള രണ്ട് എസ്.എല്‍.ആര്‍. കോച്ചുകള്‍ക്ക് പകരം ഒരു എസ്.എല്‍.ആര്‍. കോച്ചും ഒരു ജനറേറ്റര്‍, ലഗേജ് കം ബ്രേക് വാനുമാണ് എല്‍.എച്ച്.ബി. റേക്കില്‍ ഉണ്ടാവുക.

നിലവില്‍ 16 ചെയര്‍കാറുകളിലായി 106 സീറ്റുകള്‍ വീതം 1696 പേര്‍ക്കും രണ്ട് എസ്.എല്‍.ആര്‍. കോച്ചുകളിലായി 160 പേര്‍ക്കും യാത്രചെയ്യാം. ആകെ 1856 സീറ്റുകള്‍. പുതിയ എല്‍.എച്ച്.ബി. റേക്കിലെ 16 ചെയര്‍കാറുകളിലായി 102 വീതം 1632 സീറ്റുകളാണുള്ളത്. ഒരു എസ്.എല്‍.ആര്‍. കോച്ചില്‍ 31 പേര്‍ക്ക് യാത്രചെയ്യാം. ആകെ 1663 സീറ്റുകള്‍. 193 സീറ്റുകളുടെ കുറവ്. അതേസമയം, എ.സി. ചെയര്‍കാറില്‍ നിലവില്‍ മൂന്ന് കോച്ചുകളിലായുള്ള 219 സീറ്റുകള്‍ 234 ആയി ഉയരും. സീറ്റുകളുടെ കുറവിന് പരിഹാരമായി 17 ചെയര്‍കാറുകള്‍ അനുവദിക്കണമെന്ന ആവശ്യം ഉയരുന്നുണ്ട്.