'പെണ്‍സുഹൃത്തിനോട് സംസാരിച്ചു'; 'പണി' സിനിമ അനുകരിച്ച് വീട്ടില്‍ ഉറങ്ങിക്കിടന്ന യുവാവിനെ കത്തിയുമായെത്തി ക്രൂരമായി ആക്രമിച്ച് കാപ്പ പ്രതി; മര്‍ദ്ദന ദൃശ്യം വാട്‌സ് അപ്പ് സ്റ്റാറ്റസാക്കി

കൊച്ചി: കൊച്ചിയില്‍ യുവാവിനെ ക്രൂരമായി മര്‍ദ്ദിച്ച് കാപ്പ കേസ് പ്രതി. വീട്ടില്‍ ഉറങ്ങിക്കിടക്കുകയായിരുന്നു യുവാവിനെ കത്തിയുമായെത്തി ആക്രമിക്കുകയായിരുന്നു. തൃക്കാക്കര സ്വദേശിയായ യുവാവിനാണ് ക്രൂര മര്‍ദനമേറ്റത്. ആക്രമണം നടത്തിയ ശ്രീരാജ് പൊലീസ് പിടിയിലായി.

'പണി' സിനിമയില്‍ ഡേവി എന്ന കഥാപാത്രത്തെ ആക്രമിക്കുന്നത് അനുകരിച്ചായിരുന്നു ശ്രീരാജിന്റെ ആക്രമണം. രാത്രി വീട്ടില്‍ അതിക്രമിച്ച് കയറിയാണ് ഉറങ്ങിക്കിടന്ന യുവാവിനെ ആക്രമിച്ചത്. ഒരു പെണ്‍കുട്ടിയുമായുള്ള അടുപ്പത്തിന്റെ പ്രശ്‌നം പറഞ്ഞായിരുന്നു ആക്രമണം.

യുവാവിനെ വീടിന് പുറത്തേക്ക് ബലമായി കൊണ്ടുപോയും ആക്രമിച്ചു. ഇതിന്റെ ദൃശ്യങ്ങള്‍ ഫോണില്‍ പകര്‍ത്തി മര്‍ദനമേറ്റ യുവാവിന്റെ ഫോണില്‍ സ്റ്റാറ്റസായി ഇടുകയും ചെയ്തു. ഈ ദൃശ്യങ്ങള്‍ പുറത്തുവന്നതോടെയാണ് സംഭവം പൊലീസിന്റെ ശ്രദ്ധയില്‍പെട്ടത്. 'പണി' സിനിമയിലെ ഒരു രംഗം അനുകരിച്ചതാണ് താനെന്ന് ഇയാള്‍ പൊലീസിനോട് പറഞ്ഞു. പത്തിലേറെ കേസുകളില്‍ പ്രതിയാണ് ഇയാള്‍.