എസ്‌ഐഎ വീട്ടില്‍ തൂങ്ങി മരിച്ച നിലയില്‍ കണ്ടെത്തി; അടുക്കളയോട് ചേര്‍ന്നുള്ള ഷെഡില്‍ മൃതദേഹം കണ്ടെത്തി; മരണകാരണം വ്യക്തമല്ല
കൊല്ലം: കിളികൊല്ലൂര്‍ സ്പെഷല്‍ ബ്രാഞ്ച് ഗ്രേഡ് എസ്ഐ ഓമനക്കുട്ടനെ (52) വീട്ടില്‍ തൂങ്ങിമരിച്ച നിലയില്‍ കണ്ടെത്തി. പേരൂര്‍ കല്ലുവിള പുത്തന്‍വീട്ടില്‍ താമസിക്കുന്ന ഇയാളെ കഴിഞ്ഞ ദിവസം പുലര്‍ച്ചെ ആറുമണിയോടെ അടുക്കളയോട് ചേര്‍ന്ന ഷെഡില്‍ മരിച്ച നിലയില്‍ കണ്ടെത്തിയത്. തുടര്‍ന്ന് നാട്ടുകാര്‍ വിവരമറിയിച്ചതോടെ കിളികൊല്ലൂര്‍ പൊലീസ് സ്ഥലത്തെത്തി നടപടികള്‍ സ്വീകരിച്ചു. മൃതദേഹം പാരിപ്പള്ളി മെഡിക്കല്‍ കോളജ് ആശുപത്രിയിലേക്ക് മാറ്റി പോസ്റ്റ്മോര്‍ട്ടം നടത്തിയ ശേഷം മൃതദേഹം ബന്ധുക്കള്‍ക്കു കൈമാറി. സംസ്‌കാരം നടത്തി.
മരണകാരണം സംബന്ധിച്ച് വ്യക്തതയില്ല. കുടുംബപരമായ പ്രശ്നങ്ങളോ ജോലി സമ്മര്‍ദമോ മരണത്തില്‍ പങ്കുണ്ടോ എന്നാണ് പോലീസ് അന്വേഷിക്കുന്നത്. ഓമനക്കുട്ടന്‍ ഏറെക്കാലമായി പൊലീസ് വിഭാഗത്തില്‍ സേവനമനുഷ്ഠിച്ചുവരികയായിരുന്നു. ഭാര്യ ഗീതയും മക്കളായ അനന്തകൃഷ്ണനും ദേവികയും ഉള്‍പ്പെടെ ഒരു കുടുംബത്തിന്റെ നട്ടെല്ലായിരുന്നു ഇദ്ദേഹം. അപ്രതീക്ഷിത മരണത്തിന്റെ ഞെട്ടലിലാണ് കുടുംബക്കാര്‍.
