മുപ്പത് വർഷത്തിലേറെയായി പ്രവാസ ജീവിതം; ഒടുവിൽ ജോലി ചെയ്യുന്നതിനിടെ കുഴഞ്ഞുവീണ് മലയാളി കുവൈറ്റിൽ മരിച്ചു; കണ്ണീരോടെ കുടുംബം

കുവൈത്ത് സിറ്റി: കുവൈത്തിൽ ജോലി ചെയ്യുന്നതിനിടെ ഹൃദയാഘാതത്തെ തുടർന്ന് ആലപ്പുഴ സ്വദേശി മരിച്ചു. ആലപ്പുഴ പ്രയാർവടക്ക് ശ്രീമംഗലം സ്വദേശി ജയകുമാർ (50) ആണ് കുവൈത്തിലെ ജോലിസ്ഥലത്ത് കുഴഞ്ഞുവീണ് അന്തരിച്ചത്.

നെഞ്ചുവേദന അനുഭവപ്പെട്ടതിനെ തുടർന്ന് ജയകുമാർ ബോധരഹിതനാകുകയായിരുന്നു. ഉടൻതന്നെ ആശുപത്രിയിൽ പ്രവേശിപ്പിച്ചെങ്കിലും അദ്ദേഹത്തിന്റെ ജീവൻ രക്ഷിക്കാനായില്ല. മുപ്പത് വർഷത്തിലേറെയായി കുവൈത്തിലെ ഒരു എണ്ണക്കമ്പനിയിൽ സേഫ്റ്റി ഓഫീസറായി പ്രവർത്തിച്ചുവരികയായിരുന്നു ജയകുമാർ.

ഭാര്യ സുഷമ, മക്കളായ ശ്രീജ, ശ്രീലക്ഷ്മി, മരുമക്കളായ എസ്. വിഷ്ണു, വിഷ്ണു എന്നിവരാണ് അദ്ദേഹത്തിനുള്ളത്. ജയകുമാറിന്റെ മൃതദേഹം നാട്ടിലേക്ക് കൊണ്ടുപോകുന്നതിനുള്ള നടപടിക്രമങ്ങൾ പുരോഗമിച്ചുവരികയാണ്.