മരം വെട്ടുന്നതിനിടെ മിന്നൽ അടിച്ച് തൊഴിലാളിക്ക് ദാരുണാന്ത്യം; ഒരാൾക്ക് ഗുരുതര പരിക്ക്; ആശുപത്രിയിൽ പ്രവേശിപ്പിച്ചു; സംഭവം ഹരിപ്പാട്
ഹരിപ്പാട്: വീയപുരം മാർട്ടിന്റെ പുരയിടത്തിൽ മരം വെട്ടുന്നതിനിടെ മിന്നലേറ്റ് തൊഴിലാളി മരിച്ചു. തുലാംപറമ്പ് സൗത്ത് ഡാണാപ്പടി വലിയ പറമ്പിൽ പടീറ്റതിൽ ബിനു തമ്പാൻ (45) ആണ് മരിച്ചത്. ഗുരുതരമായി പരിക്കേറ്റ വെട്ടുവേനി പടിക്കിലേത്ത് വടക്കേതിൽ മഹേഷ് കുമാറിനെ (39) പരുമല സ്വകാര്യ ആശുപത്രിയിൽ പ്രവേശിപ്പിച്ചു.
ഇന്ന് രാവിലെ 11 മണിയോടെയാണ് സംഭവം. മരങ്ങളുടെ മുകളിലിരുന്ന് മരം വെട്ടുന്നതിനിടെ അപ്രതീക്ഷിതമായി മഴയും ഇടിമിന്നലുമുണ്ടായി. ഇരുവരും മിന്നലേറ്റതിനെ തുടർന്ന് താഴെ വീഴുകയായിരുന്നു. കൂടെയുണ്ടായിരുന്ന മറ്റ് തൊഴിലാളികൾ ഇവരെ ഹരിപ്പാട് താലൂക്ക് ആശുപത്രിയിൽ എത്തിച്ചെങ്കിലും ബിനുവിന്റെ ജീവൻ രക്ഷിക്കാനായില്ല. ഗുരുതരാവസ്ഥയിലായ മഹേഷിനെ വിദഗ്ധ ചികിത്സക്കായി പരുമലയിലെ സ്വകാര്യ ആശുപത്രിയിലേക്ക് മാറ്റി.
ബിനുവിന്റെ മൃതദേഹം ആലപ്പുഴ മെഡിക്കൽ കോളേജ് ആശുപത്രിയിൽ പോസ്റ്റ്‌മോർട്ടം നടപടികൾക്ക് ശേഷം നാളെ വൈകിട്ട് 3ന് ഡാണാപ്പടി സെന്റ് ജോർജ് ഓർത്തഡോക്സ് ചർച്ച് സെമിത്തേരിയിൽ സംസ്കരിക്കും. പരേതനായ തമ്പാച്ചന്റെയും ലീലാമ്മയുടെയും മകനാണ് ബിനു. ഭാര്യ: റീന. മക്കൾ: സ്നേഹ ബിനു, അലൻ ബിനു.
