റീല്‍സ് ഇഷ്ടപ്പെട്ട് പ്രതികരിക്കുന്ന പെണ്‍കുട്ടികളുമായി ചങ്ങാത്തം; പ്രായപൂര്‍ത്തായാകാത്ത പെണ്‍കുട്ടിയെ ബസിനുളളില്‍ വച്ച് പീഡിപ്പിച്ച 19-കാരന്‍ പിടിയില്‍

വിഴിഞ്ഞം: സാമൂഹികമാധ്യമങ്ങളില്‍ പങ്കുവെക്കുന്ന റീല്‍സ് ഇഷ്ടപ്പെട്ട് പ്രതികരിക്കുന്ന പെണ്‍കുട്ടികളുമായി ചങ്ങാത്തമുണ്ടാക്കി പീഡനത്തിനിരയാക്കിയ കേസില്‍ പ്രതി പിടിയില്‍. ജീവന്‍ (19) ആണ് പോലീസ് പിടിയിലായത്. സാമൂഹികമാധ്യമത്തിലൂടെ പരിചയപ്പെട്ട പ്രായപൂര്‍ത്തായാകാത്ത പെണ്‍കുട്ടിയെ ബസിനുളളില്‍ വച്ച് പീഡിപ്പിച്ച കേസിലാണ് പ്രതി പിടിയിലായത്.

ബൈക്ക് റേസിങ് നടത്തുന്ന രംഗങ്ങള്‍ ചിത്രീകരിച്ച് റീല്‍സായി സാമൂഹികമാധ്യമങ്ങളില്‍ പങ്കുവെക്കുകയും വീഡിയോ ഇഷ്ടപ്പെട്ട് പ്രതികരിക്കുന്ന പെണ്‍കുട്ടികളെ സൗഹൃദം നടിച്ച് പീഡനത്തിനിരയാക്കുന്നതുമായിരുന്നു പ്രതിയുടെ രീതിയെന്നാണ് പോലീസ് വൃത്തങ്ങള്‍ വ്യക്തമാക്കുന്നത്.

പരാതിയുടെ തുടര്‍ന്ന് വിഴിഞ്ഞം എസ്.എച്ച്.ഒ. ആര്‍. പ്രകാശിന്റെ നേതൃത്വത്തിലുളള പോലീസ് സംഘം പ്രതിയെ തമിഴ്നാട്ടിലെ തിരുനല്‍വേലിയില്‍ നിന്നാണ് പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു