ഷീറ്റും കമ്പിയും ഓട്ടോറിക്ഷയിൽ കടത്തിയ രണ്ടുപേർ അറസ്റ്റിൽ

കണ്ണൂർ: ദേശീയ പാതാ നിർമ്മാണത്തിനായി കൊണ്ടുവന്ന കമ്പിഷീറ്റുകളും ഇരുമ്പ് കമ്പികളും മോഷ്ടിച്ച് ഗുഡ്സ് ഓട്ടോറിക്ഷയിൽ കടത്താൻ ശ്രമിക്കവെ രണ്ടു പേർ പിടിയിലായി. ഡ്രൈവർ മാളിക പറമ്പ് സ്വദേശി ലാൻസിബാബു(52)മുഴപ്പിലങ്ങാട് സ്വദേശി ഡിമിത്രോവ്(22) എന്നിവരെയാണ് എടക്കാട് പൊലിസ് പിടികൂടിയത്.

വെള്ളിയാഴ്ച പുലർച്ചെയാണ് കേസിനാസ്പദമായസംഭവം. ദേശീയപാതയുടെ നിർമ്മാണത്തിനായി കൊണ്ടുവന്ന എഴുപത്തിയഞ്ച് കിലോ കമ്പിഷീറ്റുകളും ഒരു കിലോഗ്രാം തൂക്കം വരുന്ന പത്ത് എം. എമ്മിന്റെ അൻപത്തിയാറ് ഇരുമ്പ് കമ്പികളുമാണ് പ്രതികൾ മോഷ്ടിച്ചുകടത്താൻ ശ്രമിച്ചത്. ഇവ ഗുഡ്സ് ഓട്ടോറിക്ഷയിൽ കടത്തിക്കൊണ്ടു പോവാനുള്ള ശ്രമത്തിനിടെയാണ് പ്രതികൾ പിടിയിലാവുന്നത്.

എടക്കാട് എസ്. ഐ ഖാലിദ്, അജേഷ്, ബാലകൃഷ്ണൻ എന്നിവരടങ്ങിയ സംഘമാണ് പ്രതികളെ പിടികൂടിയത്.നേരത്തെ ദേശീയപാത നിർമ്മാണത്തിനായി ഇറക്കിയ കമ്പിയിൽ ക്രമക്കേടുകാണിച്ചു തട്ടിയെടുത്ത ലോറി ഡ്രൈവറും സഹായിയും പൊലീസ് പിടിയിലായിരുന്നു. സൈറ്റ് എൻജിനിയർ നടത്തിയ കണക്കെടുപ്പിലാണ് തട്ടിപ്പു വ്യക്തമായത്.