താക്കോല്‍ കൊണ്ടുള്ള കുത്തേറ്റ് കവിളില്‍ ദ്വാരം വീണു; മുന്‍വശത്തെ പല്ലുകള്‍ തകര്‍ന്നു; ദേഹത്തുടനീളം പരിക്ക്: ഇന്‍സ്റ്റഗ്രാം പോസ്റ്റിന്റെ പേരില്‍ രണ്ടാം വര്‍ഷ ബിരുദ വിദ്യാര്‍ഥിയെ ക്രൂരമായി മര്‍ദിച്ച് സീനിയര്‍ വിദ്യാര്‍ഥികള്‍

വണ്ടൂര്‍: ഇന്‍സ്റ്റഗ്രാം പോസ്റ്റിട്ടതിന്റെ പേരില്‍ രണ്ടാം വര്‍ഷ ബിരുദ വിദ്യാര്‍ഥിക്ക് സീനിയര്‍ വിദ്യാര്‍ഥികളുടെ വക ക്രൂര മര്‍ദനം. തിരുവാലി ഹിക്മിയ ആര്‍ട്സ് ആന്റ് സയന്‍സ് കോളജിലെ രണ്ടാം വര്‍ഷ ബികോം വിദ്യാര്‍ഥി ഷാനിദിനാണ് ക്രൂരമായ റാഗിങ്ങിനെതുടര്‍ന്ന് ഗുരുതര പരിക്കേറ്റത്.

സംഘം ചേര്‍ന്നുള്ള ആക്രമണത്തില്‍ ഷാനിദിന്റെ മുന്‍വശത്തെ പല്ലുകള്‍ തകര്‍ന്നു. താക്കോല്‍ കൊണ്ടുള്ള കുത്തേറ്റ് കവിളില്‍ ദ്വാരം വീണതിനെ തുടര്‍ന്ന് മൂന്ന് തുന്നലിട്ടു. ഷാനിദിന്റെ ദേഹത്തുടനീളം പരിക്കുണ്ട്. മഞ്ചേരി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഷാനിദിന്റെ രക്ഷിതാക്കള്‍ എടവണ്ണ പൊലീസില്‍ പരാതി നല്‍കി. പൊലീസ് അന്വേഷണം ആരംഭിച്ചു.