പാലിയേക്കര ടോള്‍ പിരിവ് റദ്ദാക്കിയ ഉത്തരവ് പിന്‍വലിച്ചു

തൃശൂര്‍: പാലിയേക്കരയില്‍ ടോള്‍ പിരിവ് റദ്ദാക്കിയ നടപടി തൃശൂര്‍ ജില്ലാ കളക്ടര്‍ പിന്‍വലിച്ചു. നിര്‍മാണം നടക്കുന്ന മേഖലയില്‍ ഗതാഗത ക്രമീകരണത്തിന് നടപടിയെടുക്കാം എന്ന ഉറപ്പിന്റെ അടിസ്ഥാനത്തിലാണ് വീണ്ടും ടോള്‍ പിരിക്കാനുള്ള അനുമതി കലക്ടര്‍ നല്‍കിയത്.

ഇന്നലെ രാത്രിയാണ് ജില്ലാ കലക്ടര്‍ അര്‍ജുന്‍ പാണ്ഡ്യന്‍ ടോള്‍ പിരിവ് നിര്‍ത്തിവയ്ക്കാന്‍ ഉത്തരവ് നല്‍കിയത്. പാലിയേക്കര ടോള്‍ പ്ലാസയുമായി ബന്ധപ്പെട്ട് ദേശീയപാത അധികൃതര്‍ ഏപ്രില്‍ 29 ന് രേഖാമൂലം ഉറപ്പ് നല്‍കിയതിന്റെയും സര്‍ക്കാര്‍ നിര്‍ദ്ദേശത്തിന്റെയും അടിസ്ഥാനത്തിലാണിത്.

ദേശീയപാത 544 ല്‍ മണ്ണുത്തി - ഇടപ്പള്ളി മേഖലയില്‍ ബ്ലാക്ക് സ്‌പോട്ട് റെക്ടിഫിക്കേഷന്റെ ഭാഗമായി നിര്‍മിക്കുന്ന അടിപ്പാത, മേല്‍പ്പാലങ്ങളുടെ നിര്‍മാണ പ്രവൃത്തിയുമായി ബന്ധപ്പെട്ട് ഗതാഗതക്കുരുക്ക് ഒഴിവാക്കുന്നതിനായിരുന്നു പാലിയേക്കര ടോള്‍ പ്ലാസയിലെ ടോള്‍പിരിവ് നിര്‍ത്തിവച്ചുകൊണ്ട് ഉത്തരവിറക്കിയത്.