മുഖ്യമന്ത്രി പങ്കെടുത്ത പരിപാടിയുടെ വേദിക്ക് പുറത്ത് തീപ്പൊരിയും പുകയും; കാരണം ഷോര്‍ട്ട് സര്‍ക്യൂട്ട്

പാലക്കാട്: മുഖ്യമന്ത്രി പിണറായി വിജയന്‍ പങ്കെടുത്ത പരിപാടിയുടെ വേദിക്ക് പുറത്ത് ഷോര്‍ട്ട് സര്‍ക്യൂട്ട് മൂലം തീപ്പൊരിയും പുകയും ഉയര്‍ന്നത് ആശങ്കയ്ക്കിടയാക്കി. മലമ്പുഴയില്‍ നടന്ന സംസ്ഥാനതല പട്ടികജാതി-പട്ടികവര്‍ഗ മേഖലാ സംഗമവേദിക്ക് പുറത്തായിരുന്നു സംഭവം. ഇതോടെ പരിപാടി പത്ത് മിനിറ്റോളം നിര്‍ത്തിവെച്ചു. സ്‌ക്രീനിലൂടെ പരിപാടി കണ്ടുകൊണ്ടിരുന്നവരെ ഉടനെ ഓഡിറ്റോറിയത്തിന് പുറത്തെത്തിച്ചു.

മലമ്പുഴ ട്രൈപെന്‍ഡാ ഓഡിറ്റോറിയത്തില്‍ പ്രധാനവേദിക്ക് പുറത്ത് സ്‌ക്രീനിലൂടെ പരിപാടി കാണുന്നിടത്താണ് ഷോര്‍ട്ട് സര്‍ക്യൂട്ട് ഉണ്ടായത്. പരിപാടിക്കായി സ്ഥാപിച്ച ഫ്യൂസ് ബോക്സില്‍നിന്നാണ് തീപ്പൊരി ഉയര്‍ന്നത്.

ഗ്ലാസ് വാതിലിന് പുറത്താണ് ഫ്യൂസ് ബോക്സ് ഉണ്ടായിരുന്നത് എന്നതിനാല്‍ അപകടം ഒഴിവായി. ഓവര്‍ ലോഡുമൂലമാണ് ഷോര്‍ട്ട് സര്‍ക്യൂട്ട് ഉണ്ടായത്. തുടര്‍ന്ന് ജനറേറ്റര്‍ ഉപയോഗിച്ചാണ് പരിപാടി തുടര്‍ന്നത്.