ഞാവല്‍പ്പഴമെന്ന് കരുതി വിഷക്കായ കഴിച്ചു; താമരശ്ശേരിയില്‍ നാല് സ്‌കൂള്‍ വിദ്യര്‍ത്ഥികള്‍ ആശുപത്രിയില്‍

കോഴിക്കോട്: ഞാവല്‍പ്പഴമെന്ന് കരുതി അബദ്ധത്തില്‍ വിഷക്കായ കഴിച്ച നാല് സ്‌കൂള്‍ വിദ്യാര്‍ഥികള്‍ ആശുപത്രിയില്‍. താമരശേരിയിലാണ് സംഭവം. വീടിനു സമീപത്തെ പറമ്പില്‍ നിന്നും ഞാവല്‍പ്പഴമെന്ന് കരുതിയാണ് വിദ്യാര്‍ഥികള്‍ വിഷക്കായ കഴിച്ചത്. താമരശേരി താലൂക്ക് ആശുപത്രിയില്‍ പ്രവേശിപ്പിച്ച കുട്ടികളെ പിന്നീട് മെഡിക്കല്‍ കോളജ് ആശുപത്രിയിലേക്ക് മാറ്റി.

താമരശേരി ഗവ. ഹയര്‍ സെക്കന്‍ഡറി സ്‌കൂളിലെ ഒമ്പതാം ക്ലാസ് വിദ്യാര്‍ഥിയെയാണ് വൈകിട്ടോടെ ആശുപത്രിയില്‍ പ്രവേശിപ്പിച്ചത്. രാത്രിയോടെയാണ് 3 വിദ്യാര്‍ഥികളെ കൂടി ആശുപത്രിയില്‍ എത്തിച്ചത്. കാഴ്ചയില്‍ ഞാവല്‍ പഴത്തോട് സാമ്യമുള്ളതാണ് ഈ വിഷക്കായ എന്നാണ് പ്രദേശവാസികള്‍ പറയുന്നത്. കഴിഞ്ഞ ദിവസങ്ങളിലും രണ്ടു കുട്ടികള്‍ സമാന രൂപത്തില്‍ വിഷക്കായ കഴിച്ച് താമരശേരി താലൂക്ക് ആശുപത്രിയില്‍ ചികിത്സ തേടിയിരുന്നു.