തൃശ്ശൂരില്‍ കോള്‍ പാടത്ത് നീന്താനിറങ്ങിയ നാലുപേര്‍ ഒഴുക്കില്‍പ്പെട്ടു; എന്‍ജിനീയറിങ് വിദ്യാര്‍ഥി മുങ്ങിമരിച്ചു
തൃശ്ശൂരില്‍ കോള്‍ പാടത്ത് നീന്താനിറങ്ങിയ നാലുപേര്‍ ഒഴുക്കില്‍പ്പെട്ടു; എന്‍ജിനീയറിങ് വിദ്യാര്‍ഥി മുങ്ങിമരിച്ചു
തൃശ്ശൂര്‍: മനക്കൊടി പുള്ള് കോള്‍ ടൂറിസം പദ്ധതി മേഖലയിലെ വിളക്കം മാടം കോള്‍ പാടത്ത് സുഹൃത്തുക്കള്‍ക്ക് ഒപ്പം കുളിക്കാന്‍ ഇറങ്ങിയ വിദ്യാര്‍ഥി മുങ്ങി മരിച്ചു. തൃശ്ശൂര്‍ എന്‍ജിനീയറിങ് കോളേജിലെ അവസാന വര്‍ഷ മെക്കാനിക്കല്‍ എന്‍ജിനീയറിങ് വിദ്യാര്‍ഥി പട്ടാമ്പി വാടാനാംകുറിശ്ശി സ്വദേശി ഹാഷി(22) മാണ് വ്യാഴാഴ്ച മുങ്ങിമരിച്ചത്.
ബൈക്കുകളിലായി 16 വിദ്യാര്‍ഥികളുടെ സംഘമാണ് കോള്‍ പാടത്ത് എത്തിയത്. ഇതില്‍ നീന്താനിറങ്ങിയ നാലുപേര്‍ ഒഴുക്കില്‍പ്പെട്ട് മുങ്ങിപ്പോയി. സമീപത്തെ വിനോദസഞ്ചാര കേന്ദ്രത്തിലെ വഞ്ചിയുമായി ആദ്യം നാട്ടുകാര്‍ തിരച്ചില്‍ നടത്തി. മൂന്നുപേരെ രക്ഷിച്ചെങ്കിലും ഹാഷിമിനെ കണ്ടെത്താനായില്ല.
തൃശ്ശൂരില്‍നിന്നും നാട്ടികയില്‍നിന്നും എത്തിയ അഗ്‌നിരക്ഷാ സേനാംഗങ്ങളും സ്‌കൂബാ സംഘമുള്‍പ്പടെയുള്ളവര്‍ നടത്തിയ തിരച്ചിലാണ് വൈകീട്ട് ഏഴേമുക്കാലോടെ മൃതദേഹം കോള്‍പ്പാടത്തെ സ്ലൂസിനടുത്ത് നിന്നും കണ്ടെത്തിയത്. മൃതശരീരം ജില്ലാ ആശുപത്രിയിലേക്ക് മാറ്റി. അന്തിക്കാട് പോലീസ് സ്ഥലത്ത് എത്തിയിരുന്നു
