കൊച്ചിയില്‍ നിന്നും ഡല്‍ഹിയിലേക്ക് പറന്നുയരാന്‍ തുടങ്ങിയ വിമാനത്തിന് പ്രതിസന്ധിയായത് എഞ്ചിന്‍ തകരാര്‍; റണ്‍വേയില്‍ നിന്നും തെന്നി മാറിയില്ലെന്നും വിമാനത്താവള കമ്പനി
കൊച്ചി: കൊച്ചി അന്താരാഷ്ട്ര വിമാനത്താവളത്തില്‍ നിന്ന് ഡല്‍ഹിയിലേക്കുള്ള എയര്‍ ഇന്ത്യ 504 വിമാനത്തിന് എഞ്ചിന്‍ തകരാര്‍. വിമാനം ടേക്ക് ഓഫിനിടെ റണ്‍വേയില്‍ വച്ച് പെട്ടെന്ന് നിര്‍ത്തി. റണ്‍വേയില്‍ നിന്ന് വിമാനം തെന്നിമാറിയതായി സംശയിക്കുന്നുവെന്ന് വ്യക്തമാക്കി യാത്രക്കാരന്‍ കൂടിയായ എറണാകുളം എം പി ഹൈബി ഈഡന്‍ രംഗത്തെത്തി. എന്നാല്‍ എഞ്ചിനില്‍ ചില തകരാറുകള്‍ കണ്ടെത്തിയതിനെത്തുടര്‍ന്നാണ് വിമാനം ടേക്ക് ഓഫ് ചെയ്യാത്തതെന്ന് കൊച്ചി വിമാനത്താവള അധികൃതര്‍ അറിയിച്ചു. വിമാനം തെന്നിമാറിയിട്ടില്ലെന്ന് സി ഐഎഎല്‍ (സിയാല്‍) അധികൃതര്‍ സ്ഥിരീകരിച്ചു.
വിമാനത്തിന് എന്തോ അസ്വാഭാവികത സംഭവിച്ചുവെന്ന് തോന്നുന്നുവെന്ന് എം പി ഫേസ്ബുക്കില്‍ കുറിച്ചു. ഞായറാഴ്ച രാത്രി 10.34 ന് പുറപ്പെടേണ്ട വിമാനം ഇത്രയും വൈകിയിട്ടും ഇതുവരെ ടേക്ക് ഓഫ് ചെയ്തിട്ടില്ലെന്നും ഹൈബി ഈഡന്‍ വ്യക്തമാക്കി. എഞ്ചിന്‍ തകരാറെന്ന് ക്രൂ വിശദീകരിച്ചതായും എംപി വ്യക്തമാക്കി. പ്രശ്‌നം പരിഹരിച്ചുകൊണ്ട് ഇതേ വിമാനം അധികം വൈകാതെ പുറപ്പെടുമെന്നും അധികൃതര്‍ അറിയിച്ചെങ്കിലും വിമാനത്തിന്റെ യന്ത്ര തകരാര്‍ പരിഹരിക്കാന്‍ കഴിഞ്ഞില്ല. യാത്രക്കാര്‍ക്കായി മറ്റൊരു വിമാനം സജ്ജമാക്കിയെന്നും എല്ലാവരെയും കൃത്യമായി ഡല്‍ഹിയില്‍ എത്തിക്കുമെന്നും കൊച്ചി വിമാനത്താവള അധികൃതര്‍ വ്യക്തമാക്കി.
