വേങ്ങരയില്‍ ഒരു കോടി രൂപയുടെ കുഴല്‍ പണവുമായി ഒരാള്‍ പിടിയില്‍; അകത്തായത് കൊടുവള്ളി സ്വദേശി മുഹമ്മദ് മുനീര്‍
വേങ്ങര: മലപ്പുറം വേങ്ങരയില്‍ ഒരു കോടി രൂപയുടെ കുഴല്‍ പണവുമായി ഒരാള്‍ പിടിയില്‍. കോഴിക്കോട് കൊടുവള്ളി സ്വദേശി മുഹമ്മദ് മുനീര്‍ (39) ആണ് പിടിയിലായത്. വേങ്ങര പൊലീസ് വാഹന പരിശോധന നടത്തവേ കൂരിയാട് ദേശീയ പാതയില്‍ അടിപ്പാതക്കു സമീപം വെച്ച് വരുവായില്‍ നിന്നാണ് പണം പിടികൂടിയത്.
സ്‌കൂട്ടറിന്റെ മുന്‍ഭാഗത്ത് ചാക്കില്‍ കെട്ടിവെച്ചും പിന്‍ഭാഗത്ത് ഡിക്കിയിലുമായി 500, 200 നോട്ടുകെട്ടുകളായാണ് പണം കടത്താന്‍ ശ്രമിച്ചത്. പണമത്രയും ഓണ സമയത്ത് വേങ്ങരയിലും പരിസരത്തും വിതരണം ചെയ്യാനുള്ളതായിരുന്നുവെന്ന് പൊലീസ് അറിയിച്ചു. ഉറവിടവും വിതരണത്തെ സംബന്ധിച്ചും കൂടുതല്‍ അന്വേഷണം നടത്തിവരികയാണ്.
ജില്ല പോലീസ് മേധാവി പി വിശ്വനാഥ് ഐ പി എസിന്റെ നിര്‍ദ്ദേശപ്രകാരം മലപ്പുറം ഡിവൈഎസ്പി കെ എം ബിജുവിന്റെ നേതൃത്വത്തില്‍ വേങ്ങര ഐപി ആര്‍ രാജേന്ദ്രന്‍ നായര്‍, എസ് സി പി ഒ സനൂപ്, സി പി ഒ മാരായ സ്മിജു, ലിബിന്‍, മലപ്പുറം ഡാന്‍സ്ഫ് ടീം എന്നിവരാണ് പരിശോധന നടത്തിയത്. പ്രതിയേയും പിടിച്ചെടുത്ത പണവും സാമ്പത്തിക കുറ്റാന്വേഷണ വിഭാഗത്തിനു കൈമാറും. ഓണത്തോടനുബന്ധിച്ച് ജില്ലയില്‍ വാഹന പരിശോധന കര്‍ശനമാക്കിയതായും ഇതിനകം വിവിധകേസുകളിലായി ഏകദേശം 10 കോടിയോളം കുഴല്‍പ്പണം പിടിച്ചെടുത്തതായും പൊലീസ് അറിയിച്ചു.
