ഇടുക്കി വണ്ണപ്പുറത്ത് ഓടിക്കൊണ്ടിരുന്ന കാറിന് തീപിടിച്ചു; അപകടം ഇന്ധനം നിറയ്ക്കാന്‍ പെട്രോള്‍ പമ്പിലേക്ക് കയറ്റുന്നതിനിടെ

ഇടുക്കി: ഇടുക്കി വണ്ണപ്പുറത്ത് ഓടിക്കൊണ്ടിരുന്ന കാറിന് തീപിടിച്ച് അപകടം. ഹൈറേഞ്ച് ജംഗ്ഷനിലെ പെട്രോള്‍ പമ്പിന് മുന്നില്‍ വച്ചായിരുന്നു അപകടം. കാര്‍ പൂര്‍ണ്ണമായും കത്തി നശിച്ചു. അപകടത്തില്‍ ആര്‍ക്കും പരിക്കില്ല. തൊടുപുഴയില്‍ നിന്നും വന്ന കാര്‍ ഇന്ധനം നിറയ്ക്കാന്‍ പെട്രോള്‍ പമ്പിലേക്ക് കയറ്റുന്നതിനിടെയാണ് തീ പിടിച്ചത്. തീ പടര്‍ന്നതോടെ പെട്രോള്‍ പമ്പിലും സമീപത്തെ വ്യാപാര സ്ഥാപനങ്ങളിലും ഉള്ളവരെ സ്ഥലത്ത് നിന്നും മാറ്റി. തൊടുപുഴയില്‍ നിന്ന് അഗ്‌നിരക്ഷാസേന എത്തിയാണ് തീ അണച്ചത്.