പശുവിനെ കെട്ടാനായി വയലില്‍ പോയ 68കാരന്‍ കടന്നല്‍ കുത്തേറ്റ് മരിച്ചു; രക്ഷിക്കാന്‍ ശ്രമിച്ച മകനും സുഹൃത്തും ആശുപത്രിയില്‍

കൊച്ചി: ആലുവയില്‍ കടന്നല്‍ കുത്തേറ്റ് 68കാരന് ദാരുണാന്ത്യം. കീഴ്മാട് നാലാം വാര്‍ഡില്‍ കുറുന്തല കിഴക്കേതില്‍ വീട്ടില്‍ ശിവദാസന്‍ എന്നയാളാണ് മരിച്ചത്. രക്ഷിക്കാന്‍ ശ്രമിച്ച മകന്‍ പ്രഭാതിനും സുഹൃത്ത് അജിത്തിനും കടന്നല്‍ കുത്തേറ്റു. പ്രഭാത് ആശുപത്രിയില്‍ ചികിത്സയിലാണ്. ബുധനാഴ്ച രാവിലെ പത്തരയോടെയാണ് സംഭവം. പശുവിനെ കെട്ടാനായി സമീപത്തുള്ള വയലില്‍ പോയതായിരുന്നു ശിവദാസന്‍. ഇതിനിടെ കടന്നലുകള്‍ കൂട്ടത്തോടെ അക്രമിക്കുകയായിരുന്നെന്ന് ദൃക്‌സാക്ഷികള്‍ പറഞ്ഞു. 'നിലവിളിക്കുന്ന ശബ്ദം കേട്ടാണ് ഞങ്ങള്‍ ഓടിയെത്തിയത്. ആദ്യം നോക്കിനില്‍ക്കാനേ കഴിഞ്ഞുള്ളൂ. റെയിന്‍കോട്ടും ഹെല്‍മെറ്റും ധരിച്ചാണ് പിന്നീട് ശിവദാസനെ അവിടെനിന്ന് മാറ്റാനായത്' -രക്ഷാപ്രവര്‍ത്തനത്തില്‍ പങ്കാളിയായ അജിത്ത് പറഞ്ഞു.