മദ്യലഹരിയില്‍ കണ്ണൂരിലെ വനിതാ ഹോസ്റ്റലില്‍ അതിക്രമിച്ച് കയറാന്‍ ശ്രമം; യുവാവ് പിടിയില്‍
കണ്ണൂര്‍: നഗരത്തിലെ വനിതാഹോസ്റ്റലില്‍ അതിക്രമിച്ചുകയറാന്‍ ശ്രമിച്ച യുവാവ് പിടിയില്‍. തിങ്കള്‍ രാത്രി താവക്കരയിലെ വനിതാ ഹോസ്റ്റലില്‍ കയറാന്‍ ശ്രമിച്ചയാളാണ് പിടിയിലായത്. ഹോസ്റ്റലിലെ താമസക്കാര്‍ ഉടന്‍ പൊലീസില്‍ വിവരമറിയിച്ചതിനെ തുടര്‍ന്ന് കണ്ണൂര്‍ ടൗണ്‍ പൊലീസ് സ്ഥലത്തെത്തി ഇയാളെ കസ്റ്റഡിയിലെടുക്കുകയായിരുന്നു. പിടിയിലായ യുവാവ് മദ്യലഹരിയിലായിരുന്നു.
ജീപ്പിലാണ് പ്രതി ഹോസ്റ്റലിനടുത്തേക്കു വന്നത്. പുറത്ത് ജീപ്പ് നിര്‍ത്തി മതില്‍ ചാടിക്കടക്കുന്നത് താമസക്കാരായ പെണ്‍കുട്ടികളില്‍ ചിലര്‍ കണ്ടു. ഇവര്‍ വിവരം വാര്‍ഡനെ അറിയിക്കുകയായിരുന്നു. സെക്യൂരിറ്റി ജീവനക്കാര്‍ പരിശോധിക്കാന്‍ ഇറങ്ങിയതോടെ ഇയാള്‍ ഓടി രക്ഷപ്പെടാന്‍ ശ്രമിച്ചെങ്കിലും ജീവനക്കാര്‍ പിടികൂടി തടഞ്ഞുവെച്ചു. തുടര്‍ന്ന് പൊലിസിനെ വിളിച്ചു വരുത്തി ഏല്‍പ്പിക്കുകയായിരുന്നു. കണ്ണൂര്‍ നഗരത്തില്‍ താമസിക്കുന്നയാളാണ് പ്രതിയെന്നാണ് സൂചന ഇയാളെ ചോദ്യം ചെയ്തതിനു ശേഷം ഇന്ന് അറസ്റ്റു രേഖപ്പെടുത്തുമെന്ന് കണ്ണൂര്‍ ടൗണ്‍ പൊലിസ് അറിയിച്ചു.
