ആഡംബര കാറില്‍ കുടുംബത്തോടൊപ്പം കഞ്ചാവ് കടത്ത്; അഞ്ച് ലക്ഷം രൂപയുടെ കഞ്ചാവുമായി അമ്മയും രണ്ട് മക്കളും ഉള്‍പ്പെടെ നാലു പേര്‍ പിടിയില്‍
അഞ്ച് ലക്ഷം രൂപയുടെ കഞ്ചാവുമായി അമ്മയും രണ്ട് മക്കളും ഉള്‍പ്പെടെ നാലു പേര്‍ പിടിയില്‍
കുമളി: ആന്ധ്രാപ്രദേശില്‍ നിന്നും ആഡംബര കാറില്‍ കഞ്ചാവ് കടത്താന്‍ ശ്രമിച്ച അമ്മയും രണ്ടു മക്കളും അടക്കം നാലു പേരെ പോലിസ് പിടികൂടി. ആന്ധ്ര പ്രദേശ് സ്വദേശികളായ രാജേഷ് കണ്ണന്‍, ബില്ലി രാമലക്ഷ്മി, മകന്‍ ദുര്‍ഗ പ്രകാശ്, പ്രായപൂര്‍ത്തിയാകാത്ത മകന്‍ എന്നിവരാണ് കമ്പം പൊലീസിന്റെ പിടിയിലായത്. അവധി ആഘോഷിക്കാന്‍ കഞ്ചാവുമായി കേരളത്തിലേക്ക് തിരിച്ചവരാണ് പിടിയിലായത്.
അഞ്ച് ലക്ഷം രൂപ വിലമതിക്കുന്ന 46.5 കിലോ കഞ്ചാവ് ഇവരുടെ കാറില്‍ നിന്നും കണ്ടെത്തി. വെള്ളിയാഴ്ച വൈകിട്ടാണ് കേസിനാസ്പദമായ സംഭവം നടന്നത്. കേരളത്തിലേക്ക് കടത്താന്‍ കഞ്ചാവുമായി എത്തിയ കുടുംബത്തെ കുമളിക്ക് സമീപം തമിഴ്നാട് പൊലീസ് തടയുകയായിരുന്നു. അമ്മയും രണ്ട് മക്കളുമടക്കം 4 പേരാണ് കാറിലുണ്ടായിരുന്നത്. ഒരേ കുടുംബത്തില്‍ ഉള്ളവരായതിനാല്‍ സംശയം തോന്നില്ലെന്നാണ് പ്രതികള്‍ കരുതിയത്.
എന്നാല്‍ പൊലീസ് നടത്തിയ പരിശോധനയില്‍ ഇവര്‍ കുടുങ്ങുകയായിരുന്നുഅഞ്ച് ലക്ഷത്തിലധികം രൂപ വിലമതിക്കുന്ന കഞ്ചാവാണ് കണ്ടെത്തിയതെന്ന് പൊലീസ് വ്യക്തമാക്കി. ആന്ധ്രാപ്രദേശില്‍ നിന്ന് അവധിക്കാലം ആഘോഷിക്കാന്‍ വന്നതാണെന്നും കേരളത്തിലേക്ക് കഞ്ചാവ് കടത്താനും വില്‍ക്കാനും പദ്ധതിയിട്ടിരുന്നതായും ഇവര്‍ പൊലീസിന് മൊഴി നല്‍കി. ഇവരുടെ കാര്‍ കസ്റ്റഡിയിലെടുത്തു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.
