വിവാഹത്തിന് ദിവസങ്ങള്‍ മാത്രം ബാക്കി; എആര്‍ ക്യാമ്പില്‍ നിന്നും വീട്ടില്‍ മടങ്ങി എത്തിയ പോലിസുകാരന്‍ തൂങ്ങി മരിച്ചു: ശ്രീജിത്ത് ആത്മഹത്യ ചെയ്തത് സുഹൃത്തുക്കളെ വിവാഹത്തിന് ക്ഷണിച്ച് വീട്ടില്‍ എത്തിയതിന് പിന്നാലെ

തിരുവനന്തപുരം: വിവാഹത്തിന് ദിവസങ്ങള്‍ മാത്രം ബാക്കി നില്‍ക്കെ പോലീസ് ഉദ്യോഗസ്ഥനെ വീടിന് സമീപം തൂങ്ങിമരിച്ച നിലയില്‍ കണ്ടെത്തി. ആര്യനാട് പറണ്ടോട് സ്വദേശി ശ്രീജിത്ത് (29) ആണ് മരിച്ചത്. തിരുവനന്തപുരം സിറ്റി എആര്‍ ക്യാമ്പിലെ ഉദ്യോഗസ്ഥനാണ് മരിച്ച ശ്രീജിത്ത്. വിവാഹത്തിനായി ക്യാമ്പില്‍ നിന്നും വീട്ടില്‍ മടങ്ങി എത്തിയതിന് പിന്നാലെയായിരുന്നു ആത്മഹത്യ,

എആര്‍ ക്യാമ്പിലെ ഡ്യൂട്ടി കഴിഞ്ഞ് ഇന്നലെ രാവിലെയാണ് ശ്രീജിത്ത് വീട്ടില്‍ മടങ്ങിയെത്തിയത്. വൈകുന്നേരം സുഹൃത്തുക്കളെ കാണുകയും വിവാഹത്തിന് ക്ഷണിക്കുകയും ചെയ്തിരുന്നതായാണ് വിവരം. വൈകുന്നേരം കാണുമ്പോള്‍ ശ്രീജിത്ത് സന്തോഷവാനായിരുന്നു എന്ന് സുഹൃത്തുക്കള്‍ പറയുന്നു. സുഹൃത്തുക്കളെ കണ്ട് മടങ്ങിയതിന് പിന്നാലെയായിരുന്നു ആത്മഹത്യ.

വീടിനടുത്തുള്ള മരത്തില്‍ തൂങ്ങിമരിച്ച നിലയില്‍ ശ്രീജിത്തിനെ കണ്ടെത്തുക ആയിരുന്നു. ഈ മാസം 16-ന് ശ്രീജിത്തിന്റെ വിവാഹം നടക്കാനിരിക്കുകയായിരുന്നു. വിവാഹത്തിന്റെ ഒരുക്കങ്ങള്‍ ഇരുവീടുകളിലും പുരോഗമിക്കുന്നതിനിടെയാണ് ദാരുണമായ സംഭവം നടന്നത്. എന്നാല്‍ ആത്മഹത്യയിലേക്ക് നയിക്കാനുണ്ടായ കാരണം വ്യക്തമല്ല. ശ്രീജിത്തിന്റെ മൃതദേഹം നിലവില്‍ ആര്യനാട് ആശുപത്രിയില്‍ സൂക്ഷിച്ചിരിക്കുകയാണ്. ആര്യനാട് പോലീസ് അസ്വാഭാവിക മരണത്തിന് കേസെടുത്തു.