മധ്യവയസ്‌കന്‍ വീടിനുള്ളില്‍ മരിച്ച നിലയില്‍; രക്തത്തില്‍ കുളിച്ച് മൃതദേഹം; ബന്ധു കസ്റ്റഡിയില്‍

കൊച്ചി: എറണാകുളം കോതമംഗലത്ത് മധ്യവയസ്‌കനെ വീടിനുള്ളില്‍ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തി. ചാത്തമറ്റം ഇരട്ടക്കാലി സ്വദേശി രാജന്‍ ആണ് മരിച്ചത്. മുറിക്കകത്ത് കട്ടിലിനുതാഴെ കമിഴ്ന്ന് രക്തത്തില്‍ കുളിച്ചാണ് മൃതദേഹം കണ്ടെത്തിയത്. രാജന്റേത് കൊലപാതകം എന്ന് പൊലീസ് സ്ഥിരീകരിച്ചു. പ്രതിയെന്ന് സംശയിക്കുന്നയാളെ പോത്താനിക്കാട് പൊലീസ് കസ്റ്റഡിയില്‍ എടുത്തിട്ടുണ്ട്. കൊല്ലപ്പെട്ട രാജന്റെ ബന്ധുവാണിയാള്‍.