നഴ്‌സിംഗ് കോളേജുകളില്‍ അഡ്മിഷന്‍ വാഗ്ദാനം ചെയ്ത് 2.40 ലക്ഷം തട്ടി; പ്രതി അറസ്റ്റില്‍: യുവതി പണം നല്‍കിയത് സമൂഹമാധ്യമങ്ങളിലെ പരസ്യം കണ്ട്: കബളിപ്പിക്കപ്പെട്ടത് നിരവധി പേര്‍
നഴ്‌സിംഗ് കോളേജുകളില്‍ അഡ്മിഷന്‍ വാഗ്ദാനം ചെയ്ത് 2.40 ലക്ഷം തട്ടി; പ്രതി അറസ്റ്റില്‍:
കട്ടപ്പന: നഴ്‌സിംഗ് കോളേജില്‍ അഡ്മിഷന്‍ വാഗ്ദാനം ചെയ്ത് യുവതിയെ കബളിപ്പിച്ച് പണം തട്ടിയയാല്‍ അറസ്റ്റില്‍. സമൂഹമാധ്യമങ്ങളിലൂടെ പരസ്യം ചെയ്ത് നഴ്‌സിംഗ് കോഴ്‌സിന് അഡ്മിഷന്‍ നല്‍കാമെന്ന് വിശ്വസിപ്പിച്ച് 2.40 ലക്ഷം രൂപ തട്ടിയെടുത്ത വടക്കഞ്ചേരി ഞാറംവാന്‍കുളമ്പ്, കണക്കന്‍തുരുത്തി പഴയചിറ ബിനു (49) ആണ് പിടിയിലായത്. കട്ടപ്പന സ്വദേശിയായ യുവതിയുടെ പരാതിയില്‍ കട്ടപ്പന ഡിവൈഎസ്പി യുടെ നേതൃത്യത്തിലുള്ള പൊലീസ് ആണ് അറസ്റ്റ് ചെയ്തത്.
സമൂഹമാധ്യമങ്ങളില്‍ പരസ്യം ചെയ്താണ് ഇയാള്‍ തട്ടിപ്പ് നടത്തിയത്. പാലാ, തിരുവല്ല എന്നീ സ്ഥലങ്ങളിലുള്ള നേഴ്‌സിംഗ് കോളേജുകളില്‍ അഡ്മിഷന്‍ തരപ്പെടുത്തി കൊടുക്കാമെന്നു പറഞ്ഞാണ് തട്ടിപ്പ് നടത്തിയത്. സാമൂഹ്യ മാധ്യമങ്ങളിലെ പരസ്യം കണ്ടാണ് യുവതി ഇയാളെ ബന്ധപ്പെട്ടത്. തുടര്‍ന്ന് നേഴ്‌സിംഗ് അഡ്മിഷന്‍ നല്‍കാമെന്ന് പറഞ്ഞു 2,40,000 രൂപ കബളിപ്പിച്ചെടുത്തു. അഡ്മിഷന്‍ ലഭിക്കാതെ വന്നതോടെ യുവതി ഇയാളെ ബന്ധപ്പെട്ട് പണം തിരികെ ആവശ്യപെട്ടെങ്കിലും നല്‍കിയില്ല. തുടര്‍ന്ന് യുവതി കട്ടപ്പന ഡിവൈഎസ്പി വി എ നിഷാദ്‌മോന് പരാതി നല്‍കുകയായിരുന്നു.
തുടര്‍ന്ന് ജില്ലാ പോലീസ് മേധാവി കെ എം സാബു മാത്യുവിന്റെ നിര്‍ദേശപ്രകാരം കട്ടപ്പന സിഐ റ്റി സി മുരുകന്‍, എസ്‌ഐ ബിജു ബേബി, എസ് സി പി ഒ. ജോബിന്‍ ജോസ്, റാള്‍ഫ് സെബാസ്റ്റ്യന്‍ എന്നിവരുടെ നേതൃത്വത്തിലുള്ള പൊലീസ് ഇയാളെ പാലക്കാട് നിന്ന് കസ്റ്റഡിയില്‍ എടുക്കുകയായിരുന്നു. ഇയാള്‍ക്കെതിരെ കഞ്ഞിക്കുഴി, കോട്ടയം, പൊന്‍കുന്നം, മണര്‍കാട്, പാലാരിവട്ടം, എറണാകുളം, പാമ്പാടി പോലീസ് സ്റ്റേഷനുകളില്‍ സമാന പരാതിയുള്ളതായി അന്വേഷണത്തില്‍ വ്യക്തമായി. പ്രതിയെ കട്ടപ്പന കോടതിയില്‍ ഹാജരാക്കി.
