നടിയെ ആക്രമിച്ച കേസിലെ മൂന്നാം പ്രതി മണികണ്ഠന്‍ ജീവനൊടുക്കാന്‍ ശ്രമിച്ചു; മദ്യലഹരിയില്‍ കൈഞരമ്പ് മുറിച്ച് പ്രതി
കൊച്ചി: നടിയെ ആക്രമിച്ച കേസിലെ മൂന്നാം പ്രതി മണികണ്ഠന്‍ ജീവനൊടുക്കാന്‍ ശ്രമിച്ചു. ശനിയാഴ്ച പുലര്‍ച്ചെയാണ് സംഭവം. ഇയാള്‍ മദ്യലഹരിയില്‍ കൈഞരമ്പ് മുറിക്കുകയായിരുന്നുവെന്ന് പൊലീസ് പറഞ്ഞു. പ്രശ്നമുണ്ടാക്കിയതിനെ തുടര്‍ന്ന് പാലാരിവട്ടം പൊലീസ് ഇയാളെ കസ്റ്റഡിയില്‍ എടുത്ത് വിട്ടയച്ചതിന് പിന്നാലെയാണ് ജീവനൊടുക്കാന്‍ ശ്രമിച്ചത്. നാട്ടുകാരും പൊലീസും ചേര്‍ന്നാണ് ആശുപത്രിയില്‍ എത്തിച്ചത്. നടന്‍ ദിലീപ് പ്രതിയായ നടി ആക്രമിക്കപ്പെട്ട കേസില്‍ അന്തിമവിധി ഡിസംബര്‍ എട്ടിന് വരാനിരിക്കെയാണ് സംഭവം. 27 തവണ മാറ്റിവച്ച കേസില്‍ ദിലീപ് ഉള്‍പ്പടെ ഒമ്പത് പ്രതികളാണുള്ളത്.
2017 ഫെബ്രുവരി 17ന് രാത്രിയാണ് തൃശൂരില്‍ നിന്ന് കൊച്ചിയിലേക്കുള്ള യാത്രയ്ക്കിടെ നടി ആക്രമിക്കപ്പെട്ടത്. പള്‍സര്‍ സുനി ആണ് കേസില്‍ ഒന്നാം പ്രതി. കേസിന് ആസ്പദമായ സംഭവം നടന്ന വേളയില്‍ അധിക വിവരങ്ങള്‍ ലഭ്യമായിരുന്നില്ല. എന്നാല്‍ പിന്നീട് നടന്ന സമഗ്രമായ അന്വേഷണത്തില്‍ പള്‍സര്‍ സുനിയിലൂടെയാണ് ദിലീപിലേക്ക് പോലീസ് എത്തിയത്. തുടര്‍ന്ന് എട്ടാം പ്രതിയായ നടന്‍ മൂന്ന് മാസത്തോളം ആലുവ ജയിലില്‍ കിടന്നിരുന്നു. കേസില്‍ ജാമ്യം ലഭിക്കാതെ ഏഴ് വര്‍ഷം ജയിലില്‍ കിടന്ന പള്‍സര്‍ സുനി സമീപകാലത്ത് പുറത്തിറങ്ങിയ ശേഷം വിവിധ സമയങ്ങളിലായി മാധ്യമങ്ങളോട് നടത്തിയ വെളിപ്പെടുത്തലുകള്‍ ദിലീപിനെ കൂടുതല്‍ വെട്ടിലാക്കുന്നതായിരുന്നു.
നടിയെ ആക്രമിച്ച സംഭവത്തില്‍ മുഖ്യ പ്രതി പള്‍സര്‍ സുനിയ്ക്കൊപ്പം ആദ്യാവസാനം താനും ഉണ്ടായിരുന്നതായി മണികണ്ഠന്‍ മൊഴി നല്‍കിയിരുന്നു. കേസില്‍ ആദ്യം പിടികൂടിയത് മണികണ്ഠനെയാണ്.
