ഡോക്ടര്‍ക്ക് പ്രേമലേഖനം നല്‍കിയ രോഗി; പെരുമാറ്റം അതിവിട്ടപ്പോള്‍ രോഗിയെ അവഗണിച്ചു; ഇതോടെ പീഡന പരാതി; എന്തു ചെയ്യണമെന്ന് അറിയാതെ പോലീസ്; തളിപറമ്പിലെ ആശുപത്രിയില്‍ സംഭവിച്ചത്
തളിപ്പറമ്പ് ആശുപത്രിയില്‍ 'പ്രേമരോഗ' വിവാദം. ഡോക്ടറോടു രോഗിക്കു തോന്നിയ പ്രണയം ആശുപത്രിയെ പോലും പ്രതിസന്ധിയിലാക്കി. തളിപ്പറമ്പിലെ ഒരു ആശുപത്രിയിലാണ് സംഭവം. ഡോക്ടറെ കാണാനായി എത്തിയ ഒരു യുവതിക്കു ഡോക്ടറോടു പ്രണയം തോന്നുകയായിരുന്നു. പരിശോധനയുടെ ഭാഗമായുള്ള ഡോക്ടറുടെ പെരുമാറ്റം തെറ്റിധരിക്കുകയായിരുന്നു യുവതി. അടുത്ത വരവില്‍ യുവതി ഡോക്ടര്‍ക്ക് ഒരു പ്രേമലേഖനം നല്‍കി.
പ്രേമലേഖനം ഡ്യൂട്ടിയിലുണ്ടായിരുന്ന മറ്റുള്ളവരെ കാണിച്ചു. പ്രേമരോഗം തലയ്ക്കു പിടിച്ച യുവതി ആഴ്ചയില്‍ രണ്ടു ദിവസവും ഒപിയുള്ള ഡോക്ടറെ കാണാനായി സ്ഥിരമായി എത്തിത്തുടങ്ങി. എന്നാല്‍, തന്റെ പ്രണയം ഏശുന്നില്ലെന്നു വന്നതോടെ ഡോക്ടര്‍ തന്നോട് മോശമായി പെരുമാറിയെന്നു കാണിച്ചു യുവതി പോലീസില്‍ പരാതി നല്‍കുകയായിരുന്നു. പരാതി പ്രകാരം അന്വേഷണം നടത്തിയ പോലീസിനു ഡോക്ടര്‍ പ്രേമലേഖനം ഉള്‍പ്പെടെ കൈമാറി. പോലീസ് യുവതിയെ വിളിച്ചുവരുത്തി ഉപദേശിക്കുകയും ബന്ധുക്കളെ വിളിച്ചു കാര്യങ്ങള്‍ പറയുകയും ചെയ്തു.
ഇതോടെ യുവതി പോലീസിനെതിരെയും പരാതിയുമായി രംഗത്തിറങ്ങി. ചില രാഷ്ട്രീയ പാര്‍ട്ടി നേതാക്കളെയും യുവതി നേരിട്ടു വിളിച്ചു പരാതിപ്പെട്ടു. പോലിസ് കാര്യങ്ങള്‍ എല്ലാവരെയും ബോധ്യപ്പെടുത്തിയെങ്കിലും യുവതി തന്റെ തീരുമാനത്തില്‍നിന്നു പിന്മാറാന്‍ തയ്യാറല്ല.
