വാഴ്സോ സ്പിരിറ്റ്സ് മത്സരത്തില് സ്വര്ണം നേടി മലയാളിയുടെ 'ആയുര്വോഡ്'; മുസിരിസിന്റെ പൈതൃകം ഈ സംരംഭത്തിന് പ്രചോദനമായെന്ന് സ്ഥാപകന് കൊടുങ്ങല്ലൂര് സ്വദേശി മിഥുന് മോഹന്
വാഴ്സോ സ്പിരിറ്റ്സ് മത്സരത്തില് സ്വര്ണം നേടി മലയാളിയുടെ 'ആയുര്വോഡ്'
തിരുവനന്തപുരം : പോളണ്ടില് നടന്ന വാഴ്സോ സ്പിരിറ്റ് കൊമ്പറ്റീഷന് 2025-ല് ഇന്ത്യന് പ്രചോദനമുള്ള ഹെര്ബല് മദ്യ ബ്രാന്ഡായ ആയുര്വോഡ് (Ayurvod) സ്വര്ണ്ണ മെഡല് നേടി. യൂറോപ്പിലെ ഏറ്റവും വലിയ സ്പിരിറ്റ്സ് മത്സരങ്ങളിലൊന്നായ ഈ വേദിയില് സ്വര്ണം നേടുന്ന ആദ്യ ഇന്ത്യന്-പ്രചോദിത ഹെര്ബല് ലിക്വര് ബ്രാന്ഡുകളില് ഒന്നാണ് ആയുര്വോഡ്.
ഇന്ത്യന് ആയുര്വേദ സങ്കല്പ്പങ്ങളില് നിന്നുള്ള സസ്യ ഘടകങ്ങളും, പോളണ്ടിന്റെ ലോകപ്രശസ്ത വോഡ്ക ഡിസ്റ്റിലേഷന് സാങ്കേതികവിദ്യകളും സംയോജിപ്പിച്ചാണ് ആയുര്വോഡ് നിര്മ്മിച്ചിരിക്കുന്നത്. ആധുനിക അന്താരാഷ്ട്ര ഉപഭോക്താക്കളെ ലക്ഷ്യമിട്ട് രൂപകല്പ്പന ചെയ്ത ഈ ഉല്പ്പന്നം, രുചിയിലും ഗുണനിലവാരത്തിലും ഉയര്ന്ന നിലവാരം പുലര്ത്തുന്നതായാണ് മത്സരത്തിലെ വിദഗ്ധ ജഡ്ജിംഗ് പാനല് വിലയിരുത്തിയത്.
കൊടുങ്ങല്ലൂര് സ്വദേശിയാണ് ആയുര്വോഡിന്റെ സ്ഥാപകന് മിഥുന് മോഹന്. ഒരുകാലത്ത് ലോകത്തേക്കുള്ള സുഗന്ധദ്രവ്യ വ്യാപാരത്തിന്റെ പ്രധാന കവാടമായിരുന്ന മുസിരിസിന്റെ പൈതൃകവും ഈ സംരംഭത്തിന് പ്രചോദനമായതായി അദ്ദേഹം പറഞ്ഞു.
''ലോകത്ത് നിരവധി പ്രശസ്ത ഹെര്ബല് ലിക്വറുകള് ഉണ്ടെങ്കിലും, ആയുര്വേദത്തിന്റെ ജന്മനാടായ ഇന്ത്യയെ പ്രതിനിധീകരിക്കുന്ന ഒരു ആഗോള ഹെര്ബല് സ്പിരിറ്റ് ബ്രാന്ഡ് ഇന്നുവരെ ഉണ്ടായിരുന്നില്ല. ആ ശൂന്യത നികത്താനാണ് ആയുര്വോഡ് സൃഷ്ടിച്ചത്,'' അദ്ദേഹം വ്യക്തമാക്കി.
യൂറോപ്പിലും അമേരിക്കയിലും ബോട്ടാനിക്കല് ലിക്വറുകള്ക്ക് വലിയ സ്വീകാര്യതയുള്ള സാഹചര്യത്തില്, ഇന്ത്യന് സസ്യജ്ഞാനത്തെ ആധുനിക സ്പിരിറ്റായി അവതരിപ്പിക്കുക എന്ന ലക്ഷ്യത്തോടെ ആരംഭിച്ച ആയുര്വോഡ്, ഈ സ്വര്ണ്ണ മെഡല് നേട്ടത്തോടെ അന്താരാഷ്ട്ര വിപണിയില് വലിയ ശ്രദ്ധ നേടുകയാണ്.
ഈ പുരസ്കാരം ആയുര്വോഡിന്റെ ഉല്പ്പന്ന നിലവാരത്തിനൊപ്പം തന്നെ, ഇന്ത്യന് ബോട്ടാനിക്കല് പൈതൃകത്തിന് ആഗോള തലത്തില് വാണിജ്യ സാധ്യതയുണ്ടെന്നതിന്റെ അംഗീകാരമാണെന്ന് വ്യവസായ വിദഗ്ധര് വിലയിരുത്തുന്നു.''യൂറോപ്പിന്റെ ഹൃദയഭാഗത്ത് ഒരു ഇന്ത്യന് പ്രചോദനമുള്ള സ്പിരിറ്റ് സ്വര്ണം നേടുന്നത്, നമ്മുടെ പാരമ്പര്യ ജ്ഞാനം ലോകത്തിന്റെ മുന്നിര ഷെല്ഫുകളില് സ്ഥാനം പിടിക്കാനുള്ള സാധ്യത തെളിയിക്കുന്നു,'' എന്നാണ് സ്ഥാപകന്റെ പ്രതികരണം.
അന്താരാഷ്ട്ര വിപണികളിലേക്ക് ആയുര്വോഡിന്റെ വ്യാപനം ശക്തമാക്കാനുള്ള പദ്ധതികളാണ് ഇനി കമ്പനി ലക്ഷ്യമിടുന്നത്. ഈ സ്വര്ണ്ണ മെഡല് നേട്ടം ആ യാത്രയിലെ നിര്ണായകമായൊരു ഘട്ടമായാണ് വിലയിരുത്തപ്പെടുന്നത്.
