തൃശൂരില്‍ അയ്യപ്പഭക്തര്‍ സഞ്ചരിച്ചിരുന്ന ബസും പിക്കപ്പ് വാനും കൂട്ടിയിടിച്ച് അപകടം; 17 പേര്‍ക്ക് പരിക്ക്

തൃശ്ശൂര്‍: തൃശൂരില്‍ അയ്യപ്പഭക്തര്‍ സഞ്ചരിച്ചിരുന്ന ബസും പിക്കപ്പ് വാനും കൂട്ടിയിടിച്ച് 17 അയ്യപ്പ ഭക്തര്‍ക്ക് പരിക്കേറ്റു. കേച്ചേരി-അക്കിക്കാവ് ബൈപാസിലെ പന്നിത്തടം കവലയില്‍ വെള്ളിയാഴ്ച പുലര്‍ച്ചെ 5.10-നാണ് അപകടം നടന്നത്. ഇരുവാഹനങ്ങളും ഇടിച്ചയുടന്‍ മറിഞ്ഞു. ബസ്സിലുള്ളവര്‍ക്കാണ് പരിക്കേറ്റത്. ഇവരെ കുന്നംകുളത്തെ ആശുപത്രിയില്‍ പ്രവേശിപ്പിച്ചു. ആര്‍ക്കും ഗുരുതരമായ പരിക്കില്ല.

ബൈപ്പാസിലൂടെ എത്തിയ ബസ്സും വടക്കാഞ്ചേരി-ചാവക്കാട് സംസ്ഥാന പാതയിലൂടെ വരികയായിരുന്ന പിക്കപ്പ് വാനുമാണ് കൂട്ടിയിടിച്ചത്. എരുമപ്പെട്ടി പോലീസും കുന്നംകുളം അഗ്നിരക്ഷാ സേനയും ചേര്‍ന്ന് വാഹനങ്ങള്‍ മാറ്റി. റോഡില്‍ ഒഴുകിയ ഓയില്‍ കഴുകി വൃത്തിയാക്കി ഗതാഗതം പുനഃസ്ഥാപിച്ചു. ബൈപാസ് നവീകരണത്തിന് ശേഷം സിഗ്നല്‍ സ്ഥാപിച്ചിട്ടും ദിവസവും ഇവിടെ അപകടം ഉണ്ടാകുന്നുണ്ട്.