ഫിന്ലന്ഡിലേക്ക് തൊഴില്വിസ വാഗ്ദാനം ചെയ്ത് മൂന്നു ലക്ഷം തട്ടി: പ്രതിയെ അറസ്റ്റ് ചെയ്ത് തിരുവല്ല പോലീസ്
ഫിന്ലന്ഡിലേക്ക് തൊഴില്വിസ വാഗ്ദാനം ചെയ്ത് മൂന്നു ലക്ഷം തട്ടി
തിരുവല്ല: ഫിന്ലാന്ഡിലേക്ക് തൊഴില്വിസ വാഗ്ദാനം ചെയ്ത് പണം തട്ടിയെടുത്ത കേസില് പ്രതി അറസ്റ്റല്. തിരുവല്ലയില് ഫൈവ്ലാന്ഡ് മാന്പവര് കണ്സള്ട്ടന്സി നടത്തുന്ന കുറ്റൂര് തൈമറവുംകര സപനക്കശ്ശേരില് വീട്ടില് കുര്യന് അലക്സാണ്ടര്(52) ആണ് അറസ്റ്റിലായത്.
തൊഴില്വിസ വാഗ്ദാനം ചെയ്ത് തിരുവനന്തപുരം സ്വദേശിയില് നിന്നും പല തവണകളിലായി മൂന്നുലക്ഷം രൂപ വഞ്ചിച്ചെടുത്തതിലേക്ക് കഴിഞ്ഞ വര്ഷം ഏപ്രിലില് ഇയാള്ക്കെതിരേ പോലീസ് കേസ് രജിസ്റ്റര് ചെയ്തിരുന്നു. ഒളിവില്പ്പോയ പ്രതി സമീപജില്ലകളിലും എറണാകുളത്തുമായി മാറി മാറി താമസിച്ചുവരികയായിരുന്നു.
തുടര്ച്ചയായ അന്വേഷണത്തിനൊടുവില് പോലീസ് ഇന്സ്പെക്ടര് കെ.എസ്. സുജിത്തിന്റെ നേതൃത്വത്തില് എസ്.ഐ.ഷിറാസ്, എസ്.സി.പി.ഒ മാരായ നാദിര്ഷ, അഖിലേഷ്,സി.പി.ഒ മാരായ അവിനാഷ്,ടോജോതോമസ് എന്നിവരടങ്ങിയ സംഘം പ്രതിയെ പിടികൂടുകയായിരുന്നു. ഇയാള്ക്കെതിരേ കല്പ്പറ്റ പോലീസ് സ്റ്റേഷനിലും വഞ്ചനാക്കേസ് നിലവിലുണ്ട്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
