വൃദ്ധ മാതാപിതാക്കള്ക്ക് സംരക്ഷണവും പരിചരണവും നല്കിയില്ല; നിരന്തരം ദേഹോപദ്രവവും: മകന് അറസ്റ്റില്
വൃദ്ധ മാതാപിതാക്കള്ക്ക് സംരക്ഷണവും പരിചരണവും നല്കിയില്ല
പുളിക്കീഴ്: വൃദ്ധ മാതാപിതാക്കള്ക്ക് നിയമപരമായ സംരക്ഷണവും പരിചരണവും നല്കാതെ നിരന്തരം ദേഹോപദ്രവമേല്പിച്ച കേസില് മകനെ പുളിക്കീഴ് പോലീസ് അറസ്റ്റ് ചെയ്തു. കടപ്ര മാന്നാര് തോട്ടുമട സ്വദേശിയായ തുരുത്തേല് വീട്ടില് നദീഷ് (39) ആണ് അറസ്റ്റിലായത്. മദ്യപിച്ചെത്തി സ്ഥിരമായി ദേഹോപദ്രവമേല്പിക്കുന്നതിനെ തുടര്ന്ന് മകനെതിരെ പിതാവ് തിരുവല്ല ആര്.ഡി.ഒ കോടതിയില് നല്കിയ പരാതിയില് പ്രതി വീട്ടില് നിന്നും മാറി താമസിക്കുന്നതിന് ഉത്തരവായിരുന്നു.
ഇതു പ്രകാരം മാറിത്താമസിച്ച പ്രതി ഉത്തരവ് ലംഘിച്ച് വീണ്ടും വീട്ടിലെത്തി ദേഹോപദ്രവം നടത്തി. തുടര്ന്ന് പരാതിക്കാരന് വീണ്ടും കോടതിയെ സമീപിച്ചു. മാതാപിതാക്കളെയും മുതിര്ന്ന പൗരന്മാരുടെയും സംരക്ഷണവും ക്ഷേമവും ആക്റ്റ് 2007 പ്രകാരം പ്രതിക്കെതിരെ കേസ് രജിസ്റ്റര് ചെയ്ത് നിയമനടപടി സ്വീകരിക്കാന് കോടതി ഉത്തരവാകുകയും ചെയ്തു. പുളിക്കീഴ് പോലീസ് സബ്ഇന്സ്പെക്ടര് നൗഫല് എസ് രജിസ്റ്റര് ചെയ്ത കേസില് പ്രതിയെ അറസ്റ്റ് ചെയ്ത് കോടതിയില് ഹാജരാക്കി റിമാന്ഡ് ചെയ്തു.
