പതിനാറുകാരി ആദിത്യയെ പാറക്കുളത്തില് മരിച്ച നിലയില് കണ്ടെത്തിയ സംഭവം; കൊറിയന് സുഹൃത്തെന്ന പേരില് കബളിപ്പിച്ചതെന്ന് സംശയം; പെണ്കുട്ടിയുടെ ഫോണ് തുറന്ന് പരിശോധിക്കാന് ഒരുങ്ങി പോലിസ്
ആദിത്യയുടെ മരണം: ഫോണ് തുറന്ന് പരിശോധിക്കാന് ഒരുങ്ങി പോലിസ്
കൊച്ചി: പ്ലസ് വണ് വിദ്യാര്ഥിനിയെ പാറക്കുളത്തില് മരിച്ച നിലയില് കാണപ്പെട്ട സംഭവത്തില് കൂടുതല് അന്വേഷണത്തിനൊരുങ്ങി പോലിസ്. പെണ്കുട്ടിയുടെ ഫോണിന്റെ ലോക്ക് തുറന്ന് പരിശോധനയ്ക്ക് ഒരുങ്ങുകയാണ് പോലിസ്. പ്ലസ് വണ് വിദ്യാര്ത്ഥിനിയായ തിരുവാണിയൂര് കക്കാട് കരയിലെ ആദിത്യ (16) ആണ് ആത്മഹത്യ ചെയ്തത്. സംഗീതവുമായി ബന്ധപ്പെട്ട് പ്രവര്ത്തിക്കുന്ന കൊറിയന് സുഹൃത്ത് അപകടത്തില് മരിച്ച വിവരമറിഞ്ഞ് വിഷമം സഹിക്കവയ്യാതെ ജീവന് വെടിയുന്നു എന്നാണ് ആദിത്യ ആത്മഹത്യാ കുറിപ്പില് എഴുതിയിരുന്നത്. എന്നാല് കൊറിയന് സുഹൃത്ത് എന്ന പേരില് മറ്റാരെങ്കിലും ആദിത്യയെ പറ്റിച്ചതാണോ എന്ന സംശയവും പൊലീസിനുണ്ട്.
അടുത്ത കാലത്തായി സമൂഹ മാധ്യമങ്ങളില് വരുന്ന കൊറിയന് സംഗീതവും സിനിമയുമെല്ലാമായി വളരെയേറെ സമയം ആദിത്യ ചിലവഴിച്ചിരുന്നതായാണ് വിവരം. ആദിത്യക്ക് കൊറിയന് സുഹൃത്തിന്റേത് എന്ന പേരില് വാച്ച് അടക്കമുള്ള ചില സമ്മാനങ്ങള് ലഭിച്ചിരുന്നതായും പൊലീസിന് വിവരമുണ്ട്. ഇക്കാര്യങ്ങളും പൊലീസിന്റെ അന്വേഷണ പരിധിയിലുണ്ട്. ആദിത്യയെ കബളിപ്പിക്കാനായി മറ്റാരെങ്കിലും ഇത് ചെയ്തതാണോ എന്ന സംശയവും സമൂഹ മാധ്യമങ്ങളില് നിന്ന് പ്രാഥമികമായി ലഭിച്ച വിവരങ്ങളുമാണ് ഇക്കാര്യത്തില് കൂടി അന്വേഷണം നടത്താന് പൊലീസിനെ പ്രേരിപ്പിക്കുന്നത്.
ലോക്ക് ആയിരിക്കുന്ന ആദിത്യയുടെ ഫോണ് തുറന്നു പരിശോധിക്കുന്നതിലൂടെ ഇക്കാര്യത്തില് വ്യക്തത വരുമെന്ന് ചോറ്റാനിക്കര പൊലീസ് വൃത്തങ്ങള് വ്യക്തമാക്കി. ചോറ്റാനിക്കര ഗവ. വിഎച്ച്എസ്എസില് പ്ലസ് വണ് വിദ്യാര്ഥിനിയായിരുന്നു ആദിത്യ. ചൊവ്വാഴ്ച രാവിലെ 7.45ന് ട്യൂഷനും തുടര്ന്ന് സ്കൂളിലേക്കുമായി പോയ ആദിത്യയെ പിന്നീട് വീടിന് അടുത്തുള്ള പാറമടയിലെ വെള്ളത്തില് മരിച്ച നിലയില് കണ്ടെത്തുകയായിരുന്നു. സ്കൂള് ബാഗും ലഞ്ച് ബോക്സും അടക്കമുള്ളവ കരയില് വച്ച നിലയിലാണ് കണ്ടെത്തിയത്. തുടര്ന്ന് ഇവ പരിശോധിച്ചപ്പോഴാണ് നാലു പേജുള്ള ആത്മഹത്യ കുറിപ്പ് പൊലീസ് കണ്ടെടുക്കുന്നത്. ഇതിലാണ് തന്റെ സുഹൃത്തായ കൊറിയന് വംശജന് ഈ മാസം 19ന് അപകടത്തില് മരിച്ചെന്നും ഈ വിഷമം സഹിക്കാന് കഴിയുന്നില്ലെന്നും എഴുതിയിരിക്കുന്നത്.
മുങ്ങി മരണം എന്നാണ് പോസ്റ്റ്മോര്ട്ടം റിപ്പോര്ട്ട് പറയുന്നത്. മറ്റെന്തെങ്കിലും ഇക്കാര്യത്തില് സംഭവിച്ചിട്ടുണ്ടോ എന്ന കാര്യവും പൊലീസ് അന്വേഷിക്കുന്നുണ്ട്. പൊലീസിന്റെ അന്വേഷണത്തില് എന്താണ് സംഭവിച്ചത് എന്നു തെളിയുമെന്നാണ് കുടുബം കരുതുന്നത്. കിണര് പണിക്കാരനായ മഹേഷിന്റെയും ദിവ്യയുടെയും ഏക മകളാണ് ആദിത്യ.
