കെഎസ്ആര്‍ടിസി ബസില്‍ യുവതിക്ക് നേരെ ലൈംഗിക അതിക്രമം; ആലപ്പുഴ സ്വദേശി അറസ്റ്റില്‍

എറണാകുളം: ഇടപ്പള്ളിയില്‍ വെച്ച് കെഎസ്ആര്‍ടിസി ബസില്‍ യുവതിക്ക് നേരെ ലൈംഗിക അതിക്രമം നടത്തിയ ആള്‍ അറസ്റ്റില്‍. ആലപ്പുഴ മാന്നാനം സ്വദേശി സാബുവിനെയാണ് യുവതിയുടെ പരാതിയില്‍ പോലീസ് അറസ്റ്റ് ചെയ്തത്. അതിക്രമം നേരിട്ട യുവതി കണ്ടക്ടറെ വിവരമറിയിക്കുകയും ബസ്സ് സ്റ്റേഷനില്‍ എത്തിക്കുകയും ആയിരുന്നു.

തിങ്കളാഴ്ച ഇടുക്കിയില്‍ നിന്നും കൊച്ചിയിലേക്ക് വരികയായിരുന്ന കെഎസ്ആര്‍ടിസി ബസിലാണ് സംഭവം. യുവതിയോട് ഇയാള്‍ മോശമായി പെരുമാറിയതോടെ യുവതി ഉടനടി പ്രതികരിക്കുകയും ബസിലുണ്ടായിരുന്ന മറ്റു യാത്രക്കാര്‍ വിഷയത്തില്‍ ഇടപെടുകയുമായിരുന്നു. യാത്രക്കാരുടെ സഹായത്തോടെ പിടികൂടിയ പ്രതിയെ ഇടപ്പള്ളിയില്‍ വെച്ചാണ് പോലീസിന് കൈമാറിയത്.

യുവതിയുടെ മൊഴി രേഖപ്പെടുത്തിയ ശേഷം പോലീസ് ലൈംഗിക പീഡനത്തിന് കേസ് രജിസ്റ്റര്‍ ചെയ്യുകയും തുടര്‍നടപടികള്‍ ആരംഭിക്കുകയും ചെയ്തിട്ടുണ്ട്. പൊതുഗതാഗത സംവിധാനങ്ങളില്‍ സ്ത്രീകള്‍ക്കെതിരെ വര്‍ധിച്ചുവരുന്ന ഇത്തരം അതിക്രമങ്ങളില്‍ ഉറച്ച നടപടിയുണ്ടാകുമെന്ന് അധികൃതര്‍ വ്യക്തമാക്കി.