സ്‌കൂളിലെ സെന്റ് ഓഫിന് കാറുകള്‍ കൊണ്ടുവന്ന് ഗ്രൗണ്ടില്‍ അഭ്യാസ പ്രകടനം; കാറുകള്‍ കൂട്ടിയിടിച്ച് അപകടം; സംഭവത്തില്‍ ആര്‍ക്കും പരിക്കില്ല; കേസെടുത്ത് പോലീസ്
കല്പറ്റ: സ്‌കൂളിലെ സെന്റ് ഓഫിന് കാറുകളുമായി അഭ്യാസപ്രകടനം. രണ്ട് കാറുകളും കൂട്ടിയിടിച്ചു. സംഭവത്തില്‍ കേസെടുത്ത് പോലീസ്. എന്‍.എസ്.എസ്. ഹയര്‍സെക്കന്‍ഡറി സ്‌കൂളില്‍ ഹയര്‍സെക്കന്‍ഡറി വിഭാഗം കുട്ടികളുടെ സെന്റ് ഓഫ് ദിവസമാണ് കുട്ടികള്‍ കാറുമായി സ്‌കൂളില്‍ എത്തിയത്. അഭ്യാസം നടത്തുന്നതിനിടെ കാറുകള്‍ തമ്മില്‍ കൂട്ടിയിടിക്കുകയായിരുന്നു.
അപകടത്തില്‍ ആര്‍ക്കും പരിക്കില്ല. ശനിയാഴ്ച വൈകീട്ട് സെന്റ് ഓഫ് പാരിപാടികള്‍ക്കുശേഷമായിരുന്നു കുട്ടികളുടെ അഭ്യാസപ്രകടനം. സ്‌കൂള്‍ അധികൃതരുടെ വിലക്ക് മറികടന്നാണ് വിദ്യാര്‍ഥികള്‍ കാറുകളുമായി എത്തിയത്.
ആറു കാറുകളാണ് കൊണ്ടുവന്നത്. വാടകയ്ക്കെടുത്ത ആഡംബര കാറുകളും ഇക്കൂട്ടത്തിലുണ്ട്. വിദ്യാര്‍ഥികള്‍ അപകടകരമായ വിധത്തില്‍ കാര്‍ ഓടിച്ചതും അപകടമുണ്ടായതും സ്‌കൂള്‍ അധികൃതര്‍തന്നെയാണ് കല്പറ്റ പോലീസിനെ അറിയിച്ചത്. കാര്‍ ഓടിച്ചിരുന്ന വിദ്യാര്‍ഥികള്‍ക്കെല്ലാം ലൈസന്‍സുണ്ടായിരുന്നു. വിദ്യാര്‍ഥികളുടെപേരിലും വാഹനത്തിന്റെ ആര്‍.സി. ഉടമകളുടെപേരിലും പോലീസ് കേസെടുത്തു. കാറുകളെല്ലാം പോലീസ് കസ്റ്റഡിയിലെടുത്തു.
