ഉഗ്ര ശബ്ദം കേട്ട് വീടിന് പുറത്തത്തെി, നോക്കിയപ്പോള്‍ കാര്‍ കിടന്ന് കത്തുന്നു; തീ വീട്ടിലേക്ക് ആളിപടര്‍ന്നു; പെട്രോള്‍ പന്തേറില്‍ വീടും കാറും കത്തി, വീട്ടുടമയ്ക്ക് പെള്ളലേറ്റു
തിരുവനന്തപുരം: ഉഗ്ര ശബ്ദം കേട്ട് വീടിന് പുറത്തെത്തിയപ്പോഴാണ് കാര്‍പ്പോര്‍ച്ചില്‍ കിടന്നിരുന്ന വാഹനം കത്തുന്നത് കണ്ടത്. വീടിന്റെ മുന്‍വശത്തേക്കും തീപടര്‍ന്നിരുന്നു. ആറ്റിങ്ങലിലാണ് പെട്രോള്‍ പന്തമെറിഞ്ഞ് വീടും കാറും അഗ്നിക്കിരയാക്കിയത്. ആക്രമണത്തില്‍ കാര്‍ കത്തിനശിച്ചു. വീടിനും കേടുപാടുകളുണ്ട്. ആറ്റിങ്ങല്‍ ആലങ്കോട് ദാറുസ്സലാം വീട്ടില്‍ സഫറുദ്ദീന്റെ വീടിനുനേരെയാണ് കഴിഞ്ഞദിവസം രാത്രി 11.45ഓടെ ആക്രമണമുണ്ടായത്.
തീകത്തുന്നത് കണ്ട് അണയ്ക്കാന്‍ ശ്രമിക്കവേ സഫറുദ്ദീന്റെ കാലിന് പൊള്ളലേറ്റു. പെട്രോള്‍ പോലുള്ള ദ്രാവകം നിറച്ച കാനും തീപന്തവും കാറിനെ നേരെ ആക്രമികള്‍ എറിയുകയായിരുന്നുവെന്ന് വീട്ടുകാര്‍ പറയുന്നു. ആക്രമണത്തിന്റെ സിസിടിവി ദൃശ്യങ്ങള്‍ പോലീസില്‍ ലഭിച്ചിട്ടുണ്ട്. നഗരൂര്‍ പോലീസ് സ്ഥലത്തെത്തി അന്വേഷണം ആരംഭിച്ചു.
കഴിഞ്ഞ ജൂണിലും വീടിന് നേരെ ആക്രമണം ഉണ്ടായി. വീടിന്റെ ചില്ലുകള്‍ തകര്‍ക്കുകയും കേബിളുകള്‍ നശിപ്പിക്കുകയും ചെയ്തിരുന്നു. പിന്നാലെ സിസിടിവി ക്യാമറകള്‍ സ്ഥാപിച്ചെങ്കിലും ആക്രമികള്‍ അതും നശിപ്പിച്ചു. നിരവധി പരാതികള്‍ പോലീസില്‍ വീട്ടുകാര്‍ നല്‍കിയിട്ടുണ്ട്.
