വാഹന പരിശോധനക്കിടെ ബൈക്കിൽ എത്തിവരുടെ പെരുമാറ്റത്തിൽ സംശയം; രേഖകൾ ചോദിച്ചപ്പോൾ ഓടി രക്ഷപ്പെടാൻ ശ്രമം; ബൈക്ക് മോഷ്ടാക്കളെ പൊലീസ് പിടികൂടിയത് സാഹസികമായി; സംഭവം തൃശൂരിൽ
തൃശൂർ: വാഹന പരിശോധനക്കിടെ ഓടി രക്ഷപ്പെടാൻ ശ്രമിച്ച ബൈക്ക് മോഷ്ടാക്കളെ പൊലീസ് പിടികൂടിയത് സാഹസികമായി. തൃശൂർ പട്ടാളം റോഡ് സ്വദേശി മുത്തു (28), മാടക്കത്തറ പനമ്പിള്ളി സ്വദേശി ജാതിക്കപറമ്പിൽ തദ്ദേവൂസ് (19) എന്നിവരാണ് പിടിയിലായത്. തൃശൂർ ഈസ്റ്റ് പൊലീസ് സ്റ്റേഷനിലെ സബ് ഇൻസ്പെക്ടർ സുനിൽ കുമാറും സംഘവും അശ്വനി ജങ്ഷന് സമീപത്ത് വാഹന നടത്തിയ പരിശോധനക്കിടെയാണ് പ്രതികൾ പിടിയിലായത്. ബൈക്ക് മോഷണ കേസിൽ പോലീസ് അന്വേഷിക്കുകയായിരുന്നു പ്രതികളാണ് പിടിയിലായത്.
നവംബർ 26നാണ് കേസിനാസ്പദമായ സംഭവം. പൂങ്കുന്നം റെയിൽവേ സ്റ്റേഷൻ പരിസരത്ത് പാർക്ക് ചെയ്തിരുന്ന പുറനാട്ടുക്കര സ്വദേശിയുടെ ബൈക്കാണ് മോഷ്ടിച്ചത്. സംഭവത്തിൽ ഈസ്റ്റ് പൊലീസ് സ്റ്റേഷനിൽ പരാതി നൽകിയിരുന്നു. തുടർന്ന് പ്രതികൾക്കായി പൊലീസ് അന്വേഷണം നടത്തി വരികെയായിരുന്നു. സി.സി.ടി.വി ദൃശ്യങ്ങൾ കേന്ദ്രീകരിച്ച് അന്വേഷണം നടക്കുന്നതിനിടെയാണ് പ്രതികൾ കുടുങ്ങിയത്.
വാഹന പരിശോധനക്കിടെ എത്തിയ ഇവരോട് രേഖകൾ കാണിക്കാൻ ആവശ്യപെട്ടപ്പോൾ ഓടി രക്ഷപ്പെടാൻ ശ്രമിക്കുകയായിരുന്നു. തുടർന്ന് ഇരുവരേയും പൊലീസ് ഓടിച്ചിട്ട് പിടികൂടി. അന്വേഷണ സംഘത്തിൽ സബ് ഇൻസ്പെക്ടർമാരായ സുനിൽകുമാർ, ബിബിൻ പി. നായർ, സീനിയർ സിവിൽ പൊലീസ് ഓഫിസർമാരായ സൂരജ്, സുനി, സാംസൺ, ശശീധരൻ, സിവിൽ പൊലീസ് ഓഫിസർമാരായ അജ്മൽ, സാംസൺ, സുഹീൽ എന്നിവരാണ് ഉണ്ടായിരുന്നത്.
