റെയിൽവേ സ്റ്റേഷൻ പരിസരത്ത് നിന്നും ബുള്ളറ്റ് മോഷ്ടിച്ച കേസ്; സി.സി.ടി.വി ദൃശ്യങ്ങൾ കേന്ദ്രീകരിച്ച് പൊലീസ് അന്വേഷണം; ഒടുവിൽ പ്രതി പിടിയിൽ
വടകര: റെയിൽവേ സ്റ്റേഷൻ പരിസരത്ത് നിന്നും ബുള്ളറ്റ് മോഷ്ടിച്ച കേസിലെ പ്രതിയെ പൊലീസ് പിടികൂടിയത് സാഹസികമായി. കോഴിക്കോട് കല്ലായി സ്വദേശി കോയ തൊടുവയിൽ വീട്ടിൽ മുഹമ്മദ് ഇൻസുദീൻ (32) ആണ് പൊലീസിന്റെ പിടിയിലായത്. മാഹി റെയിൽവേ സ്റ്റേഷൻ പരിസരത്തുനിന്നും ബുള്ളറ്റ് മോഷ്ടിച്ച കേസിൽ ചോമ്പാല പൊലീസാണ് പ്രതിയെ പിടികൂടിയത്.
നിരവധി മോഷണ കേസുകളിലും മയക്ക് മരുന്ന് കേസിലും പ്രതിയാണിയാൾ. സി.സി.ടി.വി ക്യാമറകൾ കേന്ദ്രീകരിച്ച് പൊലീസ് നടത്തിയ അന്വേഷണത്തിലാണ് ഇൻസുദീൻ പൊലീസിന്റെ വലയിലായത്. കോഴിക്കോട് പാളയം മാർക്കറ്റിന് സമീപം മോഷണം പോയ ബുള്ളറ്റ് സഹിതം പ്രതിയെ സാഹസികമായി പൊലീസ് പിടികൂടുകയായിരുന്നു.
എസ്.ഐ വി.കെ. മനീഷിന്റെ നേതൃത്വത്തിലായിരുന്നു പ്രതിയെ പിടികൂടിയത്. സീനിയർ സി.പി.ഒമാരായ പി.ടി. സജിത്ത്, ചിത്രദാസ്, സി.പി.ഒമാരായ അജേഷ് ,രാഗേഷ് എന്നിവരും സിറ്റി ക്രൈം സ്ക്വാഡ് അംഗങ്ങളും സംഘത്തിൽ ഉണ്ടായിരുന്നു.
