ശബരിമലയില് ബിഎസ്എന്എല്ലിന് മിന്നല് വേഗം; 15 ദിവസത്തിനുള്ളില് കൊടുത്തത് 500 പുതിയ സിമ്മുകള്; 24 മണിക്കൂര് കസ്റ്റമര് സര്വീസ് സെന്റര് പമ്പയിലും ശബരിമലയിലും
ശബരിമല: ദിവസവും ആയിരക്കണക്കിന് തീര്ത്ഥാടകര് എത്തുന്ന ശബരിമലയില് മൊബൈല് ഫോണ് വഴിയുള്ള ആശയവിനിമയത്തില് മിന്നല് വേഗതയുമായി ബിഎസ്എന്എല്. ആദ്യ 15 ദിവസങ്ങള്ക്കുള്ളില് 500 പുതിയ സിമ്മുകളാണ് നല്കിയത്. കഴിഞ്ഞ തവണ ആകെ 500 പുതിയ സിമ്മുകള് നല്കിയിരുന്നിടത്താണിത്. ഭക്തര്ക്ക് നെറ്റ്വര്ക്ക് ഉറപ്പാക്കുക എന്ന ലക്ഷ്യത്തോടെ എല്ലായിടത്തും 4 ജി സേവനം ഉറപ്പുവരുത്തിയിട്ടുണ്ട്.
പാണ്ടിത്താളം ടെലിഫോണ് എക്സ്ചേഞ്ചില് രണ്ടും മാളികപ്പുറം, കൊപ്രാപ്പുര, ദേവസ്വം സ്റ്റാഫ് ക്വാര്ട്ടേഴ്സ്, ശരംകുത്തി, ജ്യോതി നഗര് എന്നിവിടങ്ങളില് ഒരോന്നും ബിഎസ്എന്എല് ടവറുകളാണ് പ്രവര്ത്തിക്കുന്നത്. 230 ഫൈബര് ടു ദി ഹോം കണക്ഷനുകളും 300 എംബിപിഎസ് വരെ വേഗത ലഭിക്കുന്നതുമായ ഒപ്റ്റിക്കല് ഫൈബര് കണക്റ്റിവിറ്റിയും ശബരിമല, പമ്പ, നിലയ്ക്കല് എന്നിവിടങ്ങളില് സാധ്യമാക്കിയിട്ടുണ്ട്. അതിവേഗ ഇന്റര്നെറ്റ് കണക്ഷന് വഴി ശബരിമലയിലെ വിവിധ സര്ക്കാര് വകുപ്പുകളെയും സേവനങ്ങളെയും കൂടുതല് ഏകോപിപ്പിക്കാനും ബിഎസ്എന്എല്ലിന് സാധിക്കുന്നു. ഫൈബര് കണക്റ്റിവിറ്റിയിലൂടെ ദേവസ്വം ബോര്ഡ്, പൊലീസ്, വനം, ആരോഗ്യം തുടങ്ങിയ വകുപ്പുകള്, ബാങ്കുകള്, വാര്ത്താ മാധ്യമങ്ങള്, മറ്റു സര്ക്കാര് ഏജന്സികള്, വാണിജ്യ സ്ഥാപനങ്ങള് എന്നിവക്കെല്ലാം ടെലികോം സേവനങ്ങള് സജ്ജമാക്കിയിട്ടുണ്ട്.
തീര്ഥാടകരുടെ നെറ്റ്വര്ക്ക് ആവശ്യങ്ങള്ക്ക് പരിഹാരം കാണുന്നതിനായി 24 മണിക്കൂറും പ്രവര്ത്തിക്കുന്ന കസ്റ്റമര് സര്വീസ് സെന്റര് പമ്പയിലും ശബരിമലയിലും പ്രവര്ത്തിക്കുന്നു. പുതിയ മൊബൈല് കണക്ഷന് എടുക്കുന്നതിനും ഫോര്ജി സിം അപ്ഗ്രഡേഷന്, റീചാര്ജ്, ബില് പേയ്മെന്റ് തുടങ്ങിയവയ്ക്കും സേവനങ്ങള് ലഭ്യമാണ്. ശബരിമല നോഡല് ഓഫീസര് കെ ശശികുമാറിന്റെ നേതൃത്വത്തില് 12 ഓളം ജീവനക്കാരാണ് സന്നിധാനത്ത് മുഴുവന് സമയം ജോലിയില് പ്രവര്ത്തിക്കുന്നത്. ബിഎസ്എന്എല് കസ്റ്റമര് സര്വീസ് നമ്പര്: 8289965394.
