'എതിർദിശയിൽ നിന്ന് അതിവേഗതയിൽ വന്ന ഫോർച്ചുണർ കാർ ഇടിക്കുകയായിരുന്നു'; മത്സരഓട്ടത്തിൽ പാഞ്ഞെത്തിയ കാറിച്ച് ഞങ്ങൾക്ക് നഷ്ടമായത് കൊച്ചുവിനെ; രണ്ട് പേർ ഐസിയുവിൽ; ഇടിച്ച വാഹനം കണ്ടെത്തി; കുറിപ്പുമായി ഗായകൻ ഇഷാൻ ദേവ്

റാന്നി: ശബരിമല അയ്യപ്പസംഗമത്തിൽ ഭക്തിഗാന സദസ്സിൽ പങ്കെടുത്തു മടങ്ങവേ വാഹനാപകടത്തിൽ മരിച്ച ബെനറ്റ് രാജിനെ അനുസ്മരിച്ച് ഗായകൻ ഇഷാൻ ദേവ്. അയ്യപ്പസംഗമത്തിന്റെ ഭാഗമായി നടന്ന ഇഷാൻ ദേവിന്റെ ഭക്തിഗാന സദസ്സിനു പിന്നണിക്കെത്തിയ സംഘം സഞ്ചരിച്ച വാഹനമാണ് അപകടത്തിൽ പെട്ടത്. കാർ ഓടിപ്പിച്ചിരുന്നത് ബെനറ്റ് രാജായിരുന്നു. മറ്റു കാറുകളുടെ മത്സരഓട്ടമാണ് ബെനറ്റിന്റെ ജീവനെടുക്കാൻ കാരണമായതെന്ന് ഇഷാൻ ദേവ് സമൂഹമാധ്യമത്തിൽ പങ്കുവച്ച കുറിപ്പിൽ പറഞ്ഞു.

ഇഷാൻ ദേവിന്റെ കുറിപ്പിന്റെ പൂർണരൂപം:

ഇന്നലെ ഞങ്ങളുടെ ബാന്റ്‌ പ്രോഗ്രാം കഴിഞ്ഞു മടങ്ങുന്ന വഴി ഞങ്ങളുടെ ഡ്രമ്മർ കിച്ചുവിന്റെ കാർ റാന്നിയിൽ അപകടത്തിൽ പെട്ടു. കിച്ചുവിന്റെ സുഹൃത്ത് ബെനറ്റ് രാജ് ആണ് കാർ ഡ്രൈവ് ചെയ്തിരുന്നത്. എതിർദിശയിൽ നിന്ന് അതിവേഗതയിൽ wrong side കയറി വന്ന fortuner ഇടിച്ചുണ്ടായ അപകടത്തിൽ പ്രിയപ്പെട്ട കൊച്ചു എന്ന് ഞങ്ങൾ വിളിക്കുന്ന ബെനറ്റ് മരണപെട്ടു. മറ്റു കാറുകളുടെ മത്സരഓട്ടത്തിൽ വന്ന കാർ ആണ് അപകടം ഉണ്ടാക്കിയത്. അപകടത്തിൽ ഞങ്ങളുടെ ഡ്രമ്മർ കിച്ചുവിന് കാലിനു ഒടിവ് ഉണ്ടായതിനെ തുടർന്ന് കോഴഞ്ചേരി മുത്തൂറ്റ് ആശുപത്രിയിൽ surgery കഴിഞ്ഞു.. ഗിറ്റാറിസ്റ് ഡോണി ക്കു തലക്കും കൈക്കും ആണ് പരിക്ക്. ഡോണിക്കും സർജറി ആവശ്യം ഉണ്ട്. രണ്ടു പേരും അപകടനില തരണം ചെയ്തു തീവ്രപരിചരണ വിഭാഗത്തിൽ ആണ്. കുടുംബ അംഗകളും ഞങ്ങൾ സുഹൃത്തുക്കളും ഇവിടെ ആശുപത്രിയിൽ ഉണ്ട്.. ഇടിച്ച വാഹനം കണ്ടെത്തി നിയമപരമായ നടപടികൾ പോലീസിന്റെ ഭാഗത്തു നിന്ന് തുടങ്ങിയിട്ടുണ്ട്. ഈ പ്രതിസന്ധി ഘട്ടത്തിൽ അവരെ സഹായിക്കാനും, സപ്പോർട്ട് ചെയ്യുവാനും അറിയുന്നവരും, അറിയാത്തവരുമായ എല്ലാ സന്മനസ്സുകളുടെയും പ്രാർത്ഥനയും, സപ്പോർട്ടും ഉണ്ടാകണം.

ശനിയാഴ്ച ഉച്ചയ്ക്ക് 3.20ന് പുനലൂർ–മൂവാറ്റുപുഴ പാതയിൽ മന്ദിരം ജംക്‌ഷനും വാളിപ്ലാക്കൽപടിക്കും മധ്യേ പൊട്ടങ്കൽപടി വളവിലാണ് അപകടം നടന്നത്. എതിർദിശയിൽ അതിവേഗതയിൽ റോങ് സൈഡ് കയറി വന്ന ഫോർച്ച്യൂണർ കാറിടിച്ച് ബെനറ്റ് രാജ് സഞ്ചരിച്ചിരുന്ന വാഹനം പൂർണമായി തകർന്നു. ഈ അപകടത്തിൽ ഡ്രമ്മർ കിച്ചുവിന് കാലിന് ഒടിവ് സംഭവിച്ചു. ഇദ്ദേഹത്തിന് കോഴഞ്ചേരി മുത്തൂറ്റ് ആശുപത്രിയിൽ ശസ്ത്രക്രിയ നടത്തി. ഗിറ്റാറിസ്റ് ഡോണിക്ക് തലയ്ക്കും കയ്യിനും പരിക്കേറ്റിട്ടുണ്ട്. ഇദ്ദേഹത്തിനും ശസ്ത്രക്രിയ ആവശ്യമാണെന്ന് റിപ്പോർട്ടുകളുണ്ട്. ഇരുവരും അപകടനില തരണം ചെയ്തതായും തീവ്രപരിചരണ വിഭാഗത്തിൽ നിരീക്ഷണത്തിലാണെന്നും അറിയിച്ചിട്ടുണ്ട്.

മത്സരയോട്ടമാണ് അപകടത്തിന് കാരണമെന്ന് ഇഷാൻ ദേവ് കുറിപ്പിൽ സൂചിപ്പിക്കുന്നു. അപകടത്തിൽപ്പെട്ട വാഹനം പോലീസ് കണ്ടെത്തിയിട്ടുണ്ട്. നിയമനടപടികൾ ആരംഭിച്ചതായും അധികൃതർ അറിയിച്ചു. ഈ പ്രതിസന്ധി ഘട്ടത്തിൽ എല്ലാവരുടെയും പ്രാർത്ഥനയും പിന്തുണയും അഭ്യർത്ഥിച്ച് കൊണ്ടാണ് ഇഷാൻ ദേവ് കുറിപ്പ് അവസാനിപ്പിക്കുന്നത്. കാറിന്റെ വാതിലുകൾ വെട്ടിപ്പൊളിച്ചാണ് യാത്രക്കാരെ പുറത്തെടുത്തത്. ബെനറ്റിനെ കോഴഞ്ചേരി സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.