സ്‌കൂള്‍ ശാസ്‌ത്രോത്സവം സംഘാടക സമിതി രൂപീകരണ യോഗത്തില്‍ നിന്ന് രാഹുല്‍ മാങ്കൂട്ടത്തില്‍ മാറി നില്‍ക്കുമെന്ന് പ്രതീക്ഷിക്കുന്നതായി മന്ത്രി ശിവന്‍കുട്ടി; എംഎല്‍എയോട് വരരുതെന്ന് മന്ത്രി പറയുന്നത് ഇങ്ങനെ
തിരുവനന്തപുരം: കേരള സ്‌കൂള്‍ ശാസ്‌ത്രോത്സവം 2025ന്റെ സംഘാടക സമിതി രൂപീകരണ യോഗത്തില്‍ നിന്ന് രാഹുല്‍ മാങ്കൂട്ടത്തില്‍ മാറി നില്‍ക്കുമെന്ന് പ്രതീക്ഷിക്കുന്നതായി വിദ്യാഭ്യാസ മന്ത്രി വി ശിവന്‍കുട്ടി. ഈ യോഗത്തിന്റെ നോട്ടീസില്‍ അധ്യക്ഷനായി പാലക്കാട് എംഎല്‍എ ആയ രാഹുല്‍ മാങ്കൂട്ടത്തലിന്റെ പേരാണ് ഉള്‍പ്പെടുത്തിയിരുന്നത്. എന്നാല്‍ ആരോപണങ്ങള്‍ ഉയര്‍ന്നതോടെ നിലവിലെ സാഹചര്യങ്ങള്‍ പരിഗണിച്ചും, സ്ത്രീകളും കുട്ടികളും ഉള്‍പ്പെടെയുള്ള പൊതുജനങ്ങളുടെ താല്‍പര്യം മുന്‍നിര്‍ത്തിയുമാണ് രാഹുല്‍ മാറിനില്‍ക്കണമെന്ന ആവശ്യം വരുന്നത്. യോഗത്തിന്റെ സുഗമമായ നടത്തിപ്പിന് മുന്‍ഗണന നല്‍കുന്നതിനാല്‍ രാഹുല്‍ പങ്കെടുക്കാതെ മാറി നില്‍ക്കുമെന്ന് പ്രതീക്ഷിക്കുന്നതായാണ് മന്ത്രി അറിയിച്ചിരിക്കുന്നത്.
തിങ്കളാഴ്ച ഉച്ചകഴിഞ്ഞ് 3 ന് പാലക്കാട് ജില്ലാ പഞ്ചായത്ത് ഹാളില്‍ വെച്ചാണ് ശാസ്‌ത്രോത്സവത്തിന്റെ സംഘാടക സമിതി രൂപീകരണ യോഗം ചേരുന്നത്. മന്ത്രിമാരായ എം ബി രാജേഷ്, കെ കൃഷ്ണന്‍കുട്ടി, ജില്ലയിലെ എംഎല്‍എമാര്‍, തദ്ദേശ സ്വയംഭരണ വകുപ്പ് മേധാവികള്‍, പൊതു വിദ്യാഭ്യാസ വകുപ്പിലെ ഉന്നത ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുക്കുന്നുണ്ട്. എല്ലാ സംഘാടക സമിതി അംഗങ്ങളെയും മറ്റ് ക്ഷണിക്കപ്പെട്ട അതിഥികളെയും യോഗത്തിലേക്ക് സ്വാഗതം ചെയ്യുന്നതായും മന്ത്രി അറിയിച്ചു. വിദ്യാര്‍ഥികളുടെ കഴിവുകള്‍ക്ക് ചിറകുകള്‍ നല്‍കുന്ന പരിപാടിയുടെ വിജയത്തിനായി എല്ലാവരുടേയും സഹകരണമുണ്ടാകണമെന്നും മന്ത്രി കൂട്ടിച്ചേര്‍ത്തു.
