സ്പിരിറ്റ് കടത്തില്‍ കുടുങ്ങി സിപിഎമ്മിനെ നാണം കെടുത്തി; 1260 ലിറ്റര്‍ സ്പിരിറ്റ് പിടികൂടിയ കേസിലെ ഒന്നാം പ്രതി പെരുമാട്ടി ലോക്കല്‍ സെക്രട്ടറി ഹരിദാസനെ പുറത്താക്കി; ഹരിദാസനും സഹായിയും ഒളിവില്‍
പെരുമാട്ടി ലോക്കല്‍ സെക്രട്ടറി ഹരിദാസനെ പുറത്താക്കി
പാലക്കാട്: സ്പിരിറ്റ് കടത്ത് കേസില്‍ പ്രതിയായ സിപിഎം ലോക്കല്‍ സെക്രട്ടറിയെ പാര്‍ട്ടി പ്രാഥമിക അംഗത്വത്തില്‍ നിന്ന് പുറത്താക്കി. പെരുമാട്ടി ലോക്കല്‍ സെക്രട്ടറി ഹരിദാസനാണ് സ്പിരിറ്റ് കടത്ത് സംഘത്തില്‍ പ്രവര്‍ത്തിച്ചതിനെ തുടര്‍ന്ന് പാര്‍ട്ടിയില്‍ നിന്ന് പുറത്തായത്. പാര്‍ട്ടി വിരുദ്ധ പ്രവര്‍ത്തനങ്ങള്‍ നടത്തിയതിലൂടെ പാര്‍ട്ടിയുടെ പ്രതിച്ഛായക്ക് കളങ്കമേല്‍പ്പിച്ചുവെന്നും, ഇത് ഗുരുതരമായ നടപടിക്രമങ്ങളിലേക്ക് നയിച്ചുവെന്നും ചിറ്റൂര്‍ ഏരിയ സെക്രട്ടറി അറിയിച്ചു.
കഴിഞ്ഞ രാത്രി ചിറ്റൂര്‍ കമ്പാലത്തറയില്‍ നടത്തിയ വ്യാപകമായ സ്പിരിറ്റ് വേട്ടയിലാണ് 1260 ലിറ്റര്‍ സ്പിരിറ്റ് പിടികൂടിയത്. ഈ സ്പിരിറ്റ് എത്തിച്ചത് ഹരിദാസനാണെന്ന് കണ്ടെത്തിയതിനെ തുടര്‍ന്നാണ് നടപടി. സ്പിരിറ്റ് കടത്ത് കേസില്‍ ഇതുവരെ മൂന്നു പേരെ അറസ്റ്റ് ചെയ്തിട്ടുണ്ട്. തിരുവനന്തപുരം സ്വദേശി വാസവചന്ദ്രന്‍, കന്യാകുമാരി സ്വദേശി വികാസ് വിജയകുമാര്‍, ആലപ്പുഴ സ്വദേശി മനോജ് എന്നിവരാണ് പിടിയിലായത്. കേസില്‍ ഒന്നാം പ്രതിയായ ഹരിദാസനും ഇയാളുടെ സഹായിയും നിലവില്‍ ഒളിവിലാണ്. ഇവരെ കണ്ടെത്താനുള്ള ഊര്‍ജിത ശ്രമങ്ങള്‍ പോലീസ് ആരംഭിച്ചിട്ടുണ്ട്.
