ഇരുടീമും രണ്ടുംകല്പിച്ച് നടന്നെത്തി; കുറച്ച് നേരം തർക്കിച്ച ശേഷം നല്ല ഇടിപൊട്ടി; ട്യൂബ് ലൈറ്റ് പ്രയോഗത്തിൽ പരിഭ്രാന്തി; പിന്നിലെ കാരണം കേട്ട് തലപുകഞ്ഞ് അധ്യാപകർ

പാലക്കാട്: കുമരനെല്ലൂർ ഗവൺമെന്റ് സ്‌കൂളിൽ ഇൻസ്റ്റാഗ്രാമിൽ വന്ന ഒരു കമന്റിന്റെ പേരിൽ പത്താം ക്ലാസിലെയും പ്ലസ് വൺ ക്ലാസിലെയും വിദ്യാർത്ഥികൾ തമ്മിൽ കൂട്ടത്തല്ല് നടന്നു. വിദ്യാർഥികൾ രണ്ട് 'ഗ്യാങ്ങുകൾ' ആയി തിരിഞ്ഞാണ് പരസ്പരം ആക്രമിച്ചത്. ഈ സംഘങ്ങൾക്ക് ഇൻസ്റ്റാഗ്രാമിൽ പ്രത്യേക അക്കൗണ്ടുകൾ ഉണ്ടായിരുന്നു.

രണ്ടാം പാദവാർഷിക പരീക്ഷ നടക്കുന്നതിനിടെയാണ് സ്കൂളിൽ സംഘർഷമുണ്ടായത്. സംഘർഷത്തിനിടെ ഉപയോഗശൂന്യമായി കിടന്നിരുന്ന ട്യൂബ് ലൈറ്റ് ഉപയോഗിച്ചാണ് വിദ്യാർത്ഥികൾ ഏറ്റുമുട്ടിയത്. സംഭവം അറിഞ്ഞെത്തിയ പോലീസിനെത്തുന്നതിന് മുൻപ് തന്നെ നാട്ടുകാരും അധ്യാപകരും ചേർന്ന് വിദ്യാർഥികളെ പിടിച്ചുമാറ്റി. സോഷ്യൽ മീഡിയയിലെ ചെറിയ വിഷയങ്ങൾ പോലും സ്കൂൾ പരിസരത്ത് അക്രമങ്ങൾക്ക് വഴിമാറുന്നതിന്റെ ഉദാഹരണമായി ഈ സംഭവം മാറുകയായിരുന്നു.