മയക്കുവെടി വെച്ചിട്ടും കീഴടങ്ങുന്നില്ല; ജനവാസ മേഖലയിൽ ഭീതി പടർത്തിയ 'മുട്ടിക്കൊമ്പൻ' കാട് കയറി; ട്രാക്ക് ചെയ്യാനുള്ള ശ്രമങ്ങൾ തുടരുന്നു

വയനാട്: വടക്കനാട് ജനവാസമേഖലകളിൽ ഭീതിപരത്തിയ താത്തൂർ ടസ്കർ വൺ എന്നറിയപ്പെടുന്ന മുട്ടിക്കൊമ്പനെ വനംവകുപ്പ് മയക്കുവെടി വെച്ചു. കല്ലൂർകുന്ന് ഭാഗത്തുനിന്ന് രാവിലെ മയക്കുവെടി വെച്ചെങ്കിലും, ആന ഉൾക്കാട്ടിലേക്ക് മാറിയതിനെത്തുടർന്ന് ട്രാക്ക് ചെയ്യാനുള്ള ശ്രമങ്ങൾ പരാജയപ്പെട്ടു. ഇതോടെ, ആനയെ പിടികൂടി മുത്തങ്ങയിലെ ആനപ്പന്തിയിലേക്ക് മാറ്റാനുള്ള ദൗത്യം നാളത്തേക്ക് മാറ്റി വെക്കാൻ വനംവകുപ്പ് തീരുമാനിച്ചു.

ഇന്ന് രാവിലെ അഞ്ചുമണിയോടെയാണ് മുട്ടിക്കൊമ്പനെ പിടികൂടാനുള്ള ദൗത്യം ആരംഭിച്ചത്. മയക്കുവെടി വെച്ചതിന് പിന്നാലെ ഉൾവനത്തിലേക്ക് നീങ്ങിയ ആനയെ കണ്ടെത്താൻ വനംവകുപ്പ് ഉദ്യോഗസ്ഥരും ദൗത്യസംഘവും നടത്തിയ തിരച്ചിൽ ഫലം കാണാതെ വന്നതോടെയാണ് ദൗത്യം താത്കാലികമായി നിർത്തിവെക്കാൻ അധികൃതർ തീരുമാനിച്ചത്.

തുടർച്ചയായി ജനവാസമേഖലകളിലിറങ്ങി കൃഷിയിടങ്ങൾ നശിപ്പിക്കുകയും ഭീതി പരത്തുകയും ചെയ്തതിനെത്തുടർന്നാണ് വനംവകുപ്പ് ഈ ആനയെ പിടികൂടാൻ ഉത്തരവിറക്കിയത്. വയനാട് വന്യജീവി സങ്കേതത്തിലെ താത്തൂർ ടസ്കർ വൺ എന്നാണ് വനംവകുപ്പ് ഈ ആനയ്ക്ക് നൽകിയിരിക്കുന്ന പേര്.

മയക്കുവെടിയേറ്റിട്ടും ആനയെ പിടികൂടാൻ സാധിക്കാത്ത സാഹചര്യത്തിൽ, നാളെ ദൗത്യം പുനരാരംഭിക്കുമ്പോൾ പ്രദേശവാസികളുടെ സുരക്ഷ ഉറപ്പാക്കുന്നതിനും ആനയെ സുരക്ഷിതമായി പിടികൂടുന്നതിനുമുള്ള കർശന നടപടികൾ വനംവകുപ്പ് സ്വീകരിക്കുമെന്നാണ് പ്രതീക്ഷിക്കുന്നത്.