എലൂരിൽ യുവാവിനെ പുഴയിൽ വീണ് കാണാതായ സംഭവം; മൃതദേഹം കണ്ടെത്തി; അപകടം സഹോദരനോടൊപ്പം പാലത്തിനു മുകളിൽ നിൽക്കവെ

കൊച്ചി: എറണാകുളം എലൂരിൽ പുഴയിൽ വീണ് കാണാതായ യുവാവിന്റെ മൃതദേഹം കണ്ടെത്തി. പാലത്തിനു മുകളിൽ നിന്നും പുഴയിലേക്ക് അബദ്ധത്തിൽ വീഴുകയായിരുന്നു. കളമശ്ശേരി സ്വദേശി നിതിനാണ് മരിച്ചത്. ഇന്ന് പുലർച്ചെ 2 മണിയോടെയാണ് അപകടം നടന്നത്.

സഹോദരനോടൊപ്പം മേത്താനം പാലത്തിന്റെ കൈവരിയിൽ ഇരിക്കവേ നിതിൻ അബദ്ധത്തിൽ പുഴയിലേക്ക് പാലത്തിന് മുകളിൽ നിന്നും വീഴുകയായിരുന്നു.

ശേഷം പുഴയിൽ വീണ പാടെ നാട്ടുകാർ ചേർന്ന് തിരച്ചിൽ നടത്തിയെങ്കിലും ഫലം ഉണ്ടായില്ല. ഇപ്പോൾ സ്കൂബ ടീമും നാട്ടുകാരും ചേർന്ന് പുഴയിൽ തിരച്ചിൽ നടത്തിയപ്പോൾ ആണ് മൃതദേഹം കണ്ടെത്തിയത്.