ഭര്ത്താവിന്റെ വീട്ടിലേക്ക് പോകുന്നതിനിടെ ജീവനെടുത്ത് അപകടം; സ്കൂട്ടറില് ടിപ്പര് ലോറിയിടിച്ച് യുവതിക്ക് ദാരുണാന്ത്യം; വേദനയോടെ കുടുംബം
മലപ്പുറം: എ.ആര് നഗര് കൊടക്കല്ലില് മിനി ടിപ്പർ ലോറിയിടിച്ച് സ്കൂട്ടർ യാത്രികയായ യുവതി മരിച്ചു. പുകയൂര് ഒളകര സ്വദേശിനി നൗഫിയ (33) ആണ് വ്യാഴാഴ്ച ഉച്ചയോടെയുണ്ടായ അപകടത്തിൽ ദാരുണമായി മരിച്ചത്. സ്കൂട്ടറിലുണ്ടായിരുന്ന ഭര്ത്താവ് ഉള്ളാട്ടില് സഹീറലിക്ക് (41) പരിക്കേറ്റു.
വ്യാഴാഴ്ച ഉച്ചയ്ക്ക് ഒരു മണിയോടെ കുന്നുംപുറം കൊടക്കല്ലില് വെച്ചാണ് അപകടമുണ്ടായത്. നൗഫിയയുടെ കരുമ്പിലെ വീട്ടില്നിന്നും ഭര്ത്താവിൻ്റെ വീടായ പുകയൂരിലേക്ക് പോകുംവഴി ഇവർ സഞ്ചരിച്ച സ്കൂട്ടറിൽ ലോറിയിടിക്കുകയായിരുന്നു. മരിച്ച നൗഫിയ പരേതനായ കൊളത്തുമാട്ടില് മുഹമ്മദ് ഹാജിയുടെ മകളാണ്. പരിക്കേറ്റ സഹീറലി ചികിത്സയിലാണ്.
അപകടം നടന്നയുടൻ നൗഫിയ സംഭവസ്ഥലത്തുവെച്ചുതന്നെ മരിച്ചു. മൃതദേഹം ഇന്ക്വസ്റ്റ് നടപടികള് പൂര്ത്തിയാക്കി തിരൂരങ്ങാടി താലൂക്ക് ആശുപത്രി മോര്ച്ചറിയിലേക്ക് മാറ്റി. വെള്ളിയാഴ്ച രാവിലെ പോസ്റ്റ്മോര്ട്ടത്തിന് ശേഷം ഉച്ചയ്ക്ക് രണ്ടിന് പുകയൂര് പൊറ്റാണിക്കല് ജുമാമസ്ജിദ് ഖബര്സ്ഥാനില് ഖബറടക്കും.
