ഞാൻ മൊഴിഞ്ഞത് വെറുമൊരു ആധുനിക കവിത..; അത് ഒരിക്കലും അധിക്ഷേപമല്ല; രാവിലെ സ്റ്റേഷൻ വളപ്പിൽ ഒരാളുടെ കടന്നുവരവ്; മലയാളി സമൂഹത്തിനെ ഒന്നടങ്കം നാണം കെടുത്തിയ ആ നടൻ ഒടുവിൽ ചോദ്യം ചെയ്യലിന് ഹാജരായി; ഫോൺ ഉൾപ്പടെ പരിശോധിച്ച് സംഘം; വിനായകന് പണികിട്ടുമ്പോൾ
കൊച്ചി: മുൻ മുഖ്യമന്ത്രി വി.എസ്. അച്യുതാനന്ദന്റെ നിര്യാണത്തെത്തുടർന്ന് സാമൂഹിക മാധ്യമങ്ങളിൽ നടത്തിയ അപകീർത്തിപരമായ പരാമർശങ്ങളുടെ പേരിൽ നടൻ വിനായകനെ സൈബർ പോലീസ് ചോദ്യം ചെയ്തു. കൊച്ചിയിലെ സൈബർ പോലീസ് സ്റ്റേഷനിൽ അഭിഭാഷകനൊപ്പമാണ് വിനായകൻ ഹാജരായത്. സമീപകാലത്ത് അദ്ദേഹം നടത്തിയ മറ്റു ചില വിവാദ പരാമർശങ്ങളിലും അന്വേഷണസംഘം വിശദീകരണം തേടി.
പോലീസ് വിളിച്ചുവരുത്തിയതിന് തൊട്ടുമുൻപായി, വിനായകന്റെ ഫേസ്ബുക്ക് പേജിൽ നിന്ന് വിവാദപരമായ പോസ്റ്റുകൾ അപ്രത്യക്ഷമായത് ശ്രദ്ധേയമായി. ഗാനഗന്ധർവ്വൻ കെ.ജെ. യേശുദാസ്, വിഖ്യാത സംവിധായകൻ അടൂർ ഗോപാലകൃഷ്ണൻ എന്നിവർക്കെതിരെയും ഒരു മാധ്യമപ്രവർത്തകയെ ലക്ഷ്യം വെച്ചും നടത്തിയ അസഭ്യവർഷങ്ങൾ സിനിമയ്ക്കകത്തും പുറത്തും വലിയ തോതിലുള്ള പ്രതിഷേധങ്ങൾക്കാണ് തിരികൊളുത്തിയിരുന്നത്. ഈ പരാതികളുടെയെല്ലാം അടിസ്ഥാനത്തിലായിരുന്നു അന്വേഷണസംഘത്തിന്റെ നടപടി.
താൻ പങ്കുവെച്ചത് അധിക്ഷേപകരമായ ഉള്ളടക്കമല്ല, മറിച്ച് 'ആധുനിക കവിത' എന്ന നിലയിലുള്ള ഒരു ആവിഷ്കാരമാണെന്നാണ് വിനായകൻ അന്വേഷണ ഉദ്യോഗസ്ഥർക്ക് മൊഴി നൽകിയത്. ഈ അസാധാരണമായ വാദം പോലീസ് രേഖപ്പെടുത്തിയിട്ടുണ്ട്. തുടർനടപടികളുടെ ഭാഗമായി, നടന്റെ മൊബൈൽ ഫോൺ വിശദമായ ഫൊറൻസിക് പരിശോധനയ്ക്കായി അന്വേഷണസംഘം കസ്റ്റഡിയിലെടുത്തു.
യേശുദാസിനെതിരായ വ്യക്തിപരമായ അധിക്ഷേപത്തിൽ അതിരൂക്ഷമായാണ് മലയാള പിന്നണി ഗായകരുടെ സംഘടനയായ 'സമം' പ്രതികരിച്ചത്. വിനായകന്റെ പ്രവൃത്തി മലയാളി സമൂഹത്തിന് ഒന്നടങ്കം അപമാനകരവും അത്യന്തം അപലപനീയവുമാണെന്ന് സംഘടന പ്രസ്താവനയിലൂടെ വ്യക്തമാക്കി. അദ്ദേഹത്തെ 'വിനാശകൻ' എന്ന് വിശേഷിപ്പിച്ചുകൊണ്ടുള്ള സംഘടനയുടെ കുറിപ്പ്, ഈ വിഷയത്തിൽ ഉയർന്നുവന്ന പൊതുവികാരത്തിന്റെ പ്രതിഫലനമായി മാറി. പോലീസ് അന്വേഷണം ഇപ്പോഴും പുരോഗമിക്കുകയാണ്.
അതേസമയം, ഫേസ് ബുക്കിലൂടെ പ്രമുഖര്‍ക്കെതിരെ തുടര്‍ച്ചയായി അശ്ലീലവും അധിക്ഷേപവും ചൊരിയുന്ന നടന്‍ വിനായകനെതിരെ കോണ്‍ഗ്രസ് നേതാവ് മുഹമ്മദ് ഷിയാസ്. വിനായകന് ഒരു പൊതുശല്യം, കലാകാരന്‍മാര്‍ക്ക് അപമാനമായി ഈ വൃത്തിക്കെട്ടവന്‍ മാറുകയാണെന്നും എറണാകുളം ഡിസിസി പ്രസിഡന്റ് മുഹമ്മദ് ഷിയാസ് ആരോപിച്ചു. ഇയാളെ സര്‍ക്കാര്‍ പിടിച്ചുക്കെട്ടികൊണ്ട് പോയി ചികിത്സ നല്‍കണം. എല്ലാ കലാകാരന്മാര്‍ക്കും നടന്‍ അപമാനമാണെന്നും എറണാകുളം ഡിസിസി പ്രസിഡന്റ് മുഹമ്മദ് ഷിയാസ് പറഞ്ഞു. ലഹരി വ്യാപനത്തിനെതിരെ നാളെ നടക്കുന്ന വാക്കത്തോണ്‍ സംബന്ധിച്ച കാര്യത്തിനായി വിളിച്ചുചേര്‍ത്ത വാര്‍ത്ത സമ്മേളനത്തിലാണ് ഇക്കാര്യം പറഞ്ഞത്.
നടന്‍ വിനായകന് ഒരു പൊതുശല്യം ആണ്. വിനായകനെ സര്‍ക്കാര്‍ പിടിച്ച് കൊണ്ടുപോയി ചികിത്സിക്കണം. എല്ലാ കലാകാരന്മാര്‍ക്കും അപമാനമായി മാറിയിരിക്കുകയാണ് ഈ നടന്‍. എല്ലാത്തിനും പിന്നില്‍ ലഹരിയാണ്. വേടന്‍ ലഹരിക്കേസില്‍ ഉള്‍പ്പെട്ടപ്പോള്‍ തെറ്റ് ഏറ്റു പറഞ്ഞു. സിനിമ മേഖലയില്‍ എത്ര ആളുകള്‍ അതിന് തയ്യാറാക്കുന്നുണ്ട്. വിനായകന് എന്ന പൊതുശല്യത്തെ സര്‍ക്കാര്‍ ചികിത്സ നല്‍കണം, അല്ലെങ്കില്‍ പൊതുജനം തെരുവില്‍ കൈകാര്യം ചെയ്യുമെന്നും ഷിയാസ് വ്യക്തമാക്കി. എല്ലാവരെയും തെറി പറഞ്ഞിട്ട് സോറി പറഞ്ഞിട്ട് കാര്യമുണ്ടോയെന്നും ഷിയാസ് ചോദിച്ചു.
