ആനച്ചാലില്‍ ആകാശ ഭക്ഷണ ശാല തുടങ്ങിയത് രണ്ടു മാസം മുമ്പ്; അരമണിക്കൂറിന് മുതിര്‍ന്നവര്‍ക്ക് ചാര്‍ജ്ജ് ആയിരം; ഹൈഡ്രോളിക് ക്രെയിനിന്റെ ഗുണനിലവാരമില്ലായ്മ പ്രതിസന്ധിയായി; രണ്ടു വയസ്സുകാരിയെ 120 അടി ഉയരത്തില്‍ കൊണ്ടു പോയത് വിവാദമാകും; മൂന്നാറിലെ സ്‌കൈ ഡൈനിംഗിന് സ്റ്റോപ്പ് മെമ്മോ
ഇടുക്കി: മൂന്നാറിന് അടുത്ത് ആനച്ചാലില്‍ സ്‌കൈ ഡൈനിംഗില്‍ വിനോദസഞ്ചാരികള്‍ കുടുങ്ങിയ സംഭവത്തില്‍ കേസെടുത്ത് പോലീസ്. നടത്തിപ്പുകാരായ പ്രവീണ്‍, സോജന്‍ എന്നിവര്‍ക്കെതിരെയാണ് കേസ്. മനുഷ്യജീവന് അപകടമുണ്ടാക്കുന്ന പ്രവൃത്തികള്‍ എന്ന കുറ്റത്തിനാണ് കേസെടുത്തിരിക്കുന്നത്. വേണ്ടത്ര അനുമതിയില്ലാതെയാണ് കേന്ദ്രം പ്രവര്‍ത്തിച്ചിരുന്നതെന്ന് ഫയര്ഫോഴ്സ് ഉദ്യോഗസ്ഥര്‍ പറഞ്ഞു. രണ്ടുമാസം മുമ്പാണ് ആനച്ചാലില്‍ സ്‌കൈ ഡൈനിംഗ് തുടങ്ങിയത്. അരമണിക്കൂറിന് മുതിര്‍ന്നവര്‍ക്ക് ആയിരം രൂപയാണ് ഫീസ്. കുട്ടികള്‍ക്ക് സൗജന്യം. സ്ഥാപനത്തിന് സ്റ്റോപ്പ് മെമ്മോ നല്‍കിയിട്ടുണ്ട്. രണ്ടു വയസുകാരിയെ ഇത്ര ഉയരത്തില്‍ കൊണ്ടു പോയത് ജില്ലാ ഭരണകൂടം ഗൗരവത്തില്‍ എടുത്തിട്ടുണ്ട്.
ഉച്ചയ്ക്ക് രണ്ടുമണി. മൂന്നാര്‍ ആനച്ചാല്‍ ടൗണിന് സമീപത്തെ സാഹസികത നിറഞ്ഞ സ്‌കൈ ഡൈനിംഗ് (ആകാശ ഭക്ഷണശാല) രണ്ട് കുട്ടികളടക്കം അഞ്ചുപേരുമായി ആകാശത്ത് 120 അടി ഉയരത്തിലെത്തി. ആകാശക്കാഴ്ചകള്‍ ആസ്വദിച്ച് വിനോദ സഞ്ചാരികള്‍ ഭക്ഷണം കഴിച്ചു. തിരിച്ചിറക്കാന്‍നേരം ക്രെയിനിന്റെ ഹൈഡ്രോളിക് ലിവര്‍ തകരാറിലായി. താഴെയിറക്കാനാവില്ല. മംഗലാപുരം സ്വദേശികളായ മലയാളികളായ അഞ്ച് പേരാണ് കുടുങ്ങിയത്. മുഹമ്മദ് സഫ്വാന്‍, ഭാര്യ തൗഫീന, മക്കളായ ഇവാന്‍, ഇനാര എന്നിവരാണ് കുടുങ്ങിയത്. ജീവനക്കാരിയായ ഹരിപ്രിയയും ഇവര്‍ക്കൊപ്പം കുടുങ്ങിയിരുന്നു. മൂന്ന് മണിക്കൂര്‍ നീണ്ട രക്ഷാദൗത്യത്തിനൊടുവിലാണ് ഇവരെ താഴെയെത്തിച്ചത്.
ക്രെയിനിന്റെ സാങ്കേതിക തകരാറാണെന്നാണ് അധികൃതര്‍ പറയുന്നത്. ആനച്ചാലിലുള്ള സ്‌കൈഡൈനിംഗ് കേന്ദ്രത്തില്‍ 120 അടിയോളം ഉയരത്തിലാണ് സംഘം കുടുങ്ങിയത്. മൂന്നാര്‍, അടിമാലി എന്നിവിടങ്ങളില്‍ നിന്നു ഫയര്ഫോഴ്സ് എത്തി വടം ഉപയോഗിച്ചാണ് സഞ്ചാരികളെ സുരക്ഷിതമായി താഴെയെത്തിച്ചത്. ഫയര്ഫോഴ്സ് എത്തി വൈകിട്ട് അഞ്ചോടെ റോപ്പ് ഉപയോഗിച്ച് ഓരോരുത്തരെയായി താഴെയെത്തിച്ചതോടെ ആശങ്കയ്ക്ക് വിരാമം. ഇരിപ്പിടവും തീന്‍മേശയുമുള്ള പ്രത്യേക പേടകം ക്രെയിനുപയോഗിച്ച് സഞ്ചാരികളെ 120 അടി ഉയരത്തില്‍ എത്തിച്ച് ഭക്ഷണം വിളമ്പുന്നതാണ് സ്‌കൈ ഡൈനിംഗ്. സതേണ്‍ സ്‌കൈസ് എയ്‌റോ ഡൈനാമിക്‌സ് എന്ന സ്ഥാപനമാണ് നടത്തിപ്പുകാര്‍.
ജീവനക്കാര്‍ അരമണിക്കൂറോളം പരിശ്രമിച്ചിട്ടും താഴെയിറക്കാന്‍ കഴിയാത്തതോടെയാണ് ഫയര്‍ഫോഴ്‌സിനെ വിവരമറിയിച്ചത്. ഹൈഡ്രോളിക് ക്രെയിനിന്റെ ഗുണനിലവാരമില്ലായ്മയാണ് പ്രതിസന്ധിയായത് എന്നാണ് ആക്ഷേപം. സമാനതകളില്ലാത്ത ദൗത്യമാണ് ഫയര്ഫോഴ്സ് ആനച്ചാലില്‍ നടത്തിയത്. പാനിക്ക് ആവാതിരിക്കാന്‍ കുഞ്ഞുങ്ങളോട് കാണുന്ന കാഴ്ചകളെ കുറിച്ച് സംസാരിച്ചാണ് താഴെയിറക്കിയതെന്ന് രക്ഷാപ്രവര്‍ത്തനത്തിന് നേതൃത്വം നല്‍കിയ ഫയര്‍ ഫോഴ്സ് ഉദ്യോഗസ്ഥന്‍ പറഞ്ഞിരുന്നു. ഇനാര ഡൈനിലെ രക്ഷാദൗത്യം എല്ലാ അര്‍ത്ഥത്തിലും വിജയമായിരുന്നു.
ഇടുക്കി ആനച്ചാലില്‍ ഈയടുത്തായി തുടങ്ങിയ പദ്ധതിയാണ്. 120 അടി ഉയരത്തിലാണ് ആകാശത്തിരുന്ന് ഭക്ഷണം കഴിക്കുന്ന പദ്ധതി. അരമണിക്കൂറിലേറെ സമയമാണ് അവിടെ ചിലവിടുക. ഒരേസമയം 15 പേര്‍ക്ക് ഇരിക്കാനുള്ള സൗകര്യമാണ് ഇതിലുള്ളത്. ആകാശക്കാഴ്ച്ച ആസ്വദിക്കാനുള്ള സൗകര്യത്തോടെയാണ് പദ്ധതി.
